Posted: 12/08/2012 04:58 PM IST

       కొత్తగా సినీ రంగంలోకి అడుగుడి తమ శక్తి సామర్థ్యాలను నిరూపించుకోవాలనుకుంటున్న కళా తపస్వి కొండంత అభయమిచ్చారు.  కళపై తపన ఉండే యువ దర్శకులను నేటి చిత్రసీమకు అందిస్తానని ప్రముఖ సినీ దర్శకులు కె.విశ్వనాథ్ అన్నారు. విజయవాడలో మహానటి సావిత్రి కళాపీఠం, నాట్యాచార్య పవన్ బృందం సంయుక్తంగా నిర్వహించిన మహానటి సావిత్రి 76వ జయంతి వేడుకల్లో విశ్వనాధ్ ఈ వ్యాఖ్యలు చేశారు.
   స్థానిక తుమ్మలపల్లి కళాక్షేత్రంలో ఘనంగా జరిగిన ఈ కార్యక్రమంలో కె.విశ్వనాథ్‌ను మహాదర్శకుడు, చిన్నారి గాయని గజల్ సంస్కృతికి 'గజల్ గాన సుధామయి' అవార్డులతో సత్కరించారు. ఈ సందర్భంగా విశ్వనాధ్ చాలా విషయాలు వెల్లడించారు. తాను మెప్పు కోసం సినిమాలు తీయనని చెప్పారు. నేడు సందేశాత్మకమైన సినిమాలు తక్కువగా వస్తున్నాయని, ఆశ్లీలత భాగా శృతిమించడాన్ని ఆయన వ్యతిరేకించారు. నాట్యం పంచమ వేదమని, ఘంటసాల పవన్, శిష్యులను తయారు చేయటంలో ఎంతో పురోగతి సాధించాడని కొనియాడారు. తను నాట్యంలో చేసిన కృషి ఒక మంచి సినిమాగా రూపొందించవచ్చునన్నారు. నాట్యాన్ని నేర్పించటంలో తల్లి దండ్రుల ప్రోత్సాహం ఉంటేనే అందులో సంపూర్ణత సాధించవచ్చన్నారు.

      అహోబిలం పీఠాధిపతి జీయర్ స్వామి మాట్లాడుతూ సముద్రంలో లభించే స్వాతి ముత్యం అని కొనియాడారు. చక్కని సినిమాలు తీసే అరుదైన దర్శకుల్లో విశ్వనాథ్ ఒకరన్నారు. నేటి చిన్నారులకు విద్యార్థి దశ నుంచే సంస్కృతి సంప్రదాయాలు, ఆధ్యాత్మిక, భక్తి చింతనలపై ఆసక్తి పెంచాలన్నారు.
      మారిషన్ పీఠాధిపతి బృందావనం పార్థసారథి మాట్లాడుతూ చిన్నారుల్లో ఆధ్యాత్మిక విషయాన్ని ఎలా పెంపొందించాలో వివరించారు. త్వరలో మారిషస్ పీఠం నుంచి కె.విశ్వనాథ్‌కు ఉగాది పురస్కారం ఇవ్వనున్నట్లు తెలిపారు.
       సాంస్క్రుతిక కార్యక్రమాల్లో భాగంగా 250 మంది విద్యార్థుల నృత్య విన్యాసాలు.. ఘంటసాల పవన్ కుమార్ శిష్య బృందం 250 మంది చిన్నారులతో చేసిన 10 రకాల నృత్యాంశాలు ప్రేక్షకులకు కళావిందు నందించాయి.