Posted: 12/31/2012 05:46 PM IST

కొత్త సంవత్సరం రోజు కలియుగ దైవం వేంకటేశ్వర స్వామి దర్శించుకొని కొత్త కొత్త కోరికలు కోరుకోవాలని ఉంటుంది.  అందుకే జనవరి 1న తిరుమలకు భక్తులు పోటెత్తుతారు. వారి కోసం టీటీడీ ప్రత్యేక ఏర్పాట్లను చేపట్టింది. సామాన్య భక్తులకే పెద్ద పీట వేయాలని నిర్ణయించింది. జనవరి 1న వెంకన్న దర్శనం కోసం భక్తులు భారీగా తరలివచ్చే అవకాశం ఉండడంతో, ఎవరికీ ఎలాంటి ఇబ్బంది కలగకుండా జాగ్రత్త పడుతోంది. ఇందులో భాగంగా 300 రూపాయల ప్రత్యేక ప్రవేశ దర్శనం టికెట్లను 1వ తేదీన పూర్తిగా రద్దుచేస్తున్నట్లు టీటీడీ ప్రకటించింది. అన్‌లైన్‌ ద్వారా ముందుగా బుక్‌చేసుకున్న 4 వేల మందికి మాత్రం 50 రూపాయల దర్శనం కల్సిస్తున్నట్లు టీటీడీ జేఈఓ శ్రీనివాసరాజు తెలిపారు. తిరుమలకు కాలినడకన వచ్చే భక్తుల  కోసం 15 వేల టోకెన్లను కేటాయిస్తున్నట్లు వెల్లడించారు. డిసెంబర్ 31 మధ్యాహ్నం 2 గంటల నుంచి కాలినడక మార్గంలో టికెట్లు జారీ చేయనున్నట్లు తెలిపారు. సర్వదర్శనానికే అధిక ప్రాధాన్యం ఇస్తామన్నారు. డిసెంబర్‌ 31, జనవరి 1, 2వ తేదీల్లో సహాస్ర దీపాలంకరణ సేవ మినహా అన్ని ఆర్జిత సేవలు రద్దు చేస్తున్నట్లు టీటీడీ ప్రకటించింది.