టీమిండియా కోచ్ గా సౌరవ్ గంగూలీ..?

Posted: 04/16/2015 08:34 PM IST

ప్రపంచకప్ లో భారత్ సెమీస్ వరకు వెళ్లి ఒత్తిడి తట్టుకోలేక ఇంటికి వెనుదిరడంతో.. టీమ్ మెంబర్లలో ఆత్మవిశ్వాసం నింపే పనిని జట్టు కోచ్ సరిగ్గా నిర్వహించలేదన్న విమర్శలు వెల్లువెత్తుతున్న నేపథ్యంలో భారత టీమ్ కు కోచ్ గా సౌరవ్ గంగూలీని నియమించాలని బీసిసిఐ నిర్ణయానికి వచ్చిందా..? అంటే అవుననే సమాధానాలే అధికంగా వినబడుతున్నాయి. ఈ మేరకు ఇవాళ బీసిసిఐ చైర్మన్ జగ్ మోహన్ ధాల్మియాతో భారత మాజీ కెప్టెన్ సౌరవ్ గంగూలీ భేటీ అయ్యారు. అయితే ఈ విషయాన్ని ఆయన అంగీకరించినప్పటికీ వారి భేటీకి సంబంధించిన విషయాలను వెల్లడించలేదు. టీమిండియా ప్లేపర్ల్ గా, స్టేట్స్ మెన్ గా గంగూలీతో చర్చించానని సమాధానాన్ని దాటవేశారు.

ప్రస్తుతం భారత టీం కోచ్గా వున్న డంకన్ ఫ్లెచర్ పదవీ కాలం ముగియడంతో.. ఈ స్థానంలో ఎవరు వస్తారోనన్న ఊహగానాలపై రోజుకో రకమైన కథనాలు వెలుగుచూస్తున్నాయి. తొలుత భారత బ్యాటింగ్ దిగ్గజం సచిన్ టెండుల్కర్ ఈ స్థానాన్ని భర్తీ చేస్తారని కథనాలు, ఆ తరువాత టీమిండియా మరో కెప్టెన్ రాహుల్ ద్రావిడ్ ఈ స్థానాన్ని భర్తీ చేస్తారన కథనాలు వెలువడ్డాయి. తాజాగా ఈ స్థానానికి తాను పోటీలో వున్నానని భారత జట్టు మాజీ కెప్టెన్ సౌరవ్ గంగూలీ కూడా బరిలోకి దిగడంతో.. ఈ దిగ్గజ త్రయం నుంచి కోచ్ గా ఎవరిని ఎంపిక చేస్తారన్న అంశం ఉత్కంఠకు దారి తీస్తోంది.

అయితే తాజాగా చోటుచేసుకున్న పరిణామాల నేపథ్యంలో సౌరవ్ గంగూలీ భారత జట్టు కోచ్ గా మార్గనిర్ధేశకత్త్వం చేస్తారని బలమైన వార్తలను వినిపిస్తున్నాయి. ఈ నేపథ్యంలో ఆయన తనను వరించనున్న బీసిసిఐ డైరెక్టర్ పదవిని కూడా వదులకోనేందుకు సిద్దపడినట్లు సమాచారం. మరోవైపు ఈ మేరకు సౌరవ్ గంగూలీని భారత జట్టు కోచ్ గా ఎంపిక చేయాలని బిసిసిఐ చైర్మన్ జగ్ మోహన్ దాల్మియాపై పశ్చిమ బెంగా క్రికెట్ బోర్డు నుంచి కూడా తీవ్రస్థాయిలో ఒత్తడి వచ్చినట్లు సమాచారం. అయితే ఈ నెల 26 బిసిసిఐ సమావేశం అనంతరం టీమిండియాకు కోచ్ గా ఎవరిని ఎంపిక చేస్తారో తెలియనుంది. కాగా కోచ్ ను ఎంపిక చేసే బాధ్యతలు భారత్ మాజీ కెప్టెన్ సునిల్ గవాస్కర్ ప్యానెల్ పై వున్నాయని సమాచారం.

జి. మనోహర్