Posted: 06/30/2012 12:51 PM IST

గత నాలుగైదు రోజులుగా అందరినీ వేధిస్తున్న సస్పెన్స్‌కు తెరపడింది. లండన్ ఒలింపిక్స్‌లో తాను ఆడనున్నట్టు వెటరన్ ఆటగాడు లియాండర్ పేస్ ప్రకటించడంతో అఖిల భారత టెన్నిస్ సంఘం (ఎఐటిఎ) ఊపిరి పీల్చుకుంది. ఈ మెగా టోర్నీకి పేస్ భాగస్వామిగతా తొలుత మహేష్ భూపతిని ఎంపిక చేసిన విషయం తెలిసిందే. అయితే, పేస్‌తో కలిసి ఆడేందుకు భూపతి నిరాకరించడంతో వివాదం చెలరేగింది. సుమారు ఏడాది కాలంగా రోహన్ బొపన్న తన డబుల్స్ భాగస్వామిగా ఉన్నాడని, అతనిని కాదని పేస్‌కు జోడీగా వెళ్లాలనడంలో అర్థం లేదని భూపతి వాదించాడు. ఎఐటిఎ తన నిర్ణయం మార్చుకోకపోతే ఒలింపిక్స్ నుంచి వైదొలగుతానని ప్రకటించాడు. బొపన్న కూడా ఇదే అభిప్రాయాన్ని వ్యక్తం చేయడంతో గత్యంతరం లేని పరిస్థితుల్లో పేస్‌కు జోడీగా విష్ణువర్ధన్‌ను ఎఐటిఎ ప్రకటించింది. డబుల్స్ ప్రపంచ ర్యాంకింగ్స్‌లో పేస్ ఏడో స్థానంలో ఉంటే, విష్ణువర్ధన్‌ది 206వ స్థానం. భూపతి ఒత్తిళ్లకు ఎఐటిఎ తలవంచిందని, అంతర్జాతీయ పోటీల్లో పెద్దగా అనుభవం లేని ఆటగాడిని తనకు పార్ట్‌నర్‌గా ఎంపిక చేసిందని పేస్ ఆగ్రహం వ్యక్తం చేసినట్టు వార్తలు వచ్చాయి.

తీవ్ర మనస్థాపానికి గురైన అతను ఒలింపిక్స్‌లో ఆడరాదని నిర్ణయించినట్టు మీడియాలో కథనాలు రావడంతో ఎఐటిఎతోపాటు అభిమానులు కూడా ఆందోళన చెందారు. పేస్ ఒలింపిక్స్‌లో ఆడతాడా లేదా అన్న అనుమానం ప్రతి ఒక్కరినీ వేధించింది. అతని నిర్ణయం ఎలావుంటుందోనన్న సస్పెన్స్ నెలకొంది. అయితే, తాను ఒలింపిక్స్‌లో పాల్గొంటానని పేస్ ప్రకటించడంతో సస్పెన్స్‌కు తెరపడింది. దేశ ప్రయోజనాలే తనకు ముఖ్యమని, అందుకే ఎఐటిఎ ఎంపిక చేసిన భాగస్వామితో కలిసి ఆడేందుకు తనకు ఎలాంటి అభ్యంతరం లేదని పేస్ స్పష్టం చేశాడు.