అయోమయం స్థితిలో వైకాపా

Posted: 07/11/2013 03:52 PM IST

వైఎస్ ఆర్ కాంగ్రెస్ పార్టీ నేతలు నిత్యం ఏదో ఒక అంశంతో వార్తల్లోకి ఎక్కి హడావుడి చేస్తుంటారు. కింది స్థాయి నుండి కేడర్ దాకా ఇదే బాటలో పయనిస్తుంటారు. అయితే ప్రస్తుతం వీరంతా పోలీసు కేసుల్లో చిక్కి వార్తల్లో కెక్కడంతో ఆ పార్టీ భవిష్యత్తు అయోమయంలో పడింది. ఇప్పటికే వైకాపా అధ్యక్షుడు జగన్ ఏడాదిగా జైలులో ఉండగా.. తాజాగా ఆ పార్టీకి చెందిన శ్రీధర్ రెడ్డి హత్య కేసులో జైలు పాలయ్యాడు. రాజమండ్రి సెక్యూరిటీ ఉద్యోగిని హత్య చేసి 7 కోట్ల రూపాయలను అపహరించిన కేసులో నిందితులుగా ఉన్న 11 మంది వైకాపా నేతలే అని సమాచారం. ఈ కేసులో ప్రధాన నిందితుడు శ్రీధర్ రెడ్డి జగన్ పార్టీకి చెందిన నేతే అని ఇప్పటికే స్పష్టమైంది. మరో వైపు జగన్ మేనమామ, కడప మాజీ మేయర్ రవీంద్రనాధ్ రెడ్డిపై కూడా పలు కేసులు విచారణలో ఉన్నాయి. మద్యం కుంభకోణంలో ఆరోపణలు ఎదుర్కొంటున్న నున్నా వెంకటరమణ సైతం వైకాపా నేతే. ఇంకో వైపు విశాఖలో అరెస్టయిన దొంగ నోట్ల ముద్రణ కేసులోని నిందితులూ ఈ పార్టీకి చెందిన వారే. వీరి వద్ద నుండి భారీ ముద్రణా సామాగ్రిని పోలీసులు స్వాధీనం చేసుకున్నారు. ఈ ఘటనలపై వైకాపా నేతలు స్పందించారు. ఇలాంటి నేరాలు చేసే వారికి తమ పార్టీకి ఎలాంటి సంబంధం లేదని బుకాయించారు. అయితే అక్రమంగా సంపాదించిన సొమ్మంతా పార్టీ కార్యక్రమాలకే ఖర్చు చేశామని నిందితులు స్పష్టం చేశారు.