ఈమె, ఈయన లపై 420 కేసు ?

Posted: 04/23/2013 12:16 PM IST

తెలంగాణ ప్రత్యేక రాష్ట్రం విషయంలో కాలయాపనకు కారణమవుతున్నారనే ఫిర్యాదు మేరకు యూపీఏ చైర్‌పర్సన్ సోనియాగాంధీ, రాజమండ్రి ఎంపీ ఉండవల్లి అరుణ్‌కుమార్‌లపై కేసు నమోదు చేయాలని మల్కాజిగిరి పదో మెట్రోపాలిటిన్ కోర్టు కుషాయిగూడ పోలీసులకు సూచించిందని న్యాయవాది మేకల శ్రీనివాస్‌యాదవ్ తెలిపారు. సోనియా గాంధీ, ఉండవల్లిపై చర్యలు తీసుకోవాలని కోరుతూ బీజేపీ రాష్ట్ర కార్యవర్గ సభ్యుడు సతీష్ అగర్వాల్ గత జనవరి 29న మల్కాజిగిరి పదో మెట్రోపాలిటిన్ కోర్టులో ప్రైవేటు పిటిషన్ దాఖలు చేశారు. 2004 ఎన్నికల సందర్భంగా కరీంనగర్‌లో ఏర్పాటు చేసిన బహిరంగ సభలో సోనియాగాంధీ తెలంగాణ ప్రత్యేక రాష్ట్ర ప్రకటన తమ ఎన్నికల మ్యానిఫెస్టోలో ఉందని, తెలంగాణ ఇవ్వడంలో తమకెలాంటి అభ్యంతరంలేదని చెప్పారని పిటిషనర్ ప్రస్తావించారు. నాడు ఆమె ప్రసంగాన్ని తెలుగులోకి అనువాదం చేసి ప్రజలకు వినిపించిన రాజమండ్రి ఎంపీ ఉండవల్లి అరుణ్‌కుమార్ ఇప్పుడు ప్రత్యేక తెలంగాణకు వ్యతిరేకంగా మాట్లాడుతున్నారని పేర్కొన్నారు. ప్రత్యేక తెలంగాణ విషయంలో ప్రజలను నమ్మించి, ఇప్పుడు కాలయాపనకు కారణమవుతున్న వారిద్దరిపై చీటింగ్ కేసు నమోదుకు ఆదేశించాలని కోర్టును కోరారు. ఆయన ఫిర్యాదును పరిశీలించిన కోర్టు... ఫిర్యాదు మేరకు కేసు నమోదు చేసి, ఈ నెల 29 లోగా వివరణ ఇవ్వాలని కుషాయిగూడ పోలీసులకు సూచించింది. కోర్టు ఆదేశాలు అందాయని, ఉన్నతాధికారుల సూచనలననుసరించి కేసు నమోదు చేస్తామని కుషాయిగూడ ఇన్‌స్పెక్టర్ వెంకట్‌రెడ్డి తెలిపారు.