Posted: 03/01/2013 05:42 PM IST

ఉగ్రవాద దాడులు జరిగే అవకాశం ఉందంటూ కేంద్ర హోం శాఖ ముందస్తు హెచ్చరికలు జారీ చేసినా...ఉపేక్షిస్తూ కూర్చున్నారనే ఆరోపణలపై నగర పోలీసు కమిషనర్ అనురాగ్‌శర్మపై కేంద్ర హోం శాఖ గుర్రుమంటోంది. తక్షణమే ఆయన్ను ఆ స్థానం నుంచి తప్పించి... మరో సమర్థుడైన అధికారికి చోటు కల్పించాలని కేంద్ర హోం శాఖ రాష్ట్ర ప్రభుత్వానికి సిఫారసు చేసినట్లు విశ్వసనీయ వర్గాలు తెలిపాయి. అయితే అనురాగ్‌శర్మ బదిలీ ప్రతిపాదనను డీజీపీ దినేష్‌రెడ్డి తీవ్రంగా వ్యతిరేకిస్తున్నారు. ఈ అంశంపై ఎలా ముందుకెళ్లాలనే అంశంపై ముఖ్యమంత్రి కిరణ్‌కుమార్‌రెడ్డి తర్జనభర్జనలు పడుతున్నారు. అయితే అనురాగ్‌శర్మ బదిలీ తప్పదని ఢిల్లీకి చెందిన అధికార వర్గాలు చెబుతున్నాయి.  బాంబు పేలుళ్ల ఘటనను నిరోధించటంలో అనురాగ్‌శర్మ వైఫల్యం ఏ మేరకు ఉందనే అంశంపై కిరణ్‌కుమార్‌రెడ్డి స్వయంగా నివేదిక తెప్పించుకుంటున్నారు. ఫిబ్రవరి 21న దిల్‌సుక్‌నగర్‌లో జరిగిన జంట పేలుళ్లలో 16 మంది మృత్యువాత పడటంతో అటు కేంద్రం, ఇటు రాష్ట్ర ప్రభుత్వం ఉలిక్కిపడిన సంగతి తెలిసిందే. ఎన్నికల ఏడాదిలోకి ప్రవేశిస్తున్న తరుణంలో చోటుచేసుకున్న ఉగ్రదాడులు ప్రభుత్వానికి ఓ సవాల్‌గా పరిణమించాయి. 

అందుకే ప్రధాన మంత్రి మన్మోహన్‌సింగ్ కూడా స్వయంగా వచ్చి సంఘటనా స్థలాన్ని సందర్శించటంతో పాటు....భవిష్యత్‌లో ఇలాంటి ఘటనలు చోటుచేసుకుండా కఠిన చర్యలు తీసుకోవాలని ఆదేశించిన సంగతి తెలిసిందే. నగర పోలీస్ కమిషనర్ నియామకానికి ముందు అనురాగ్‌శర్మ ఎప్పుడూ పోలీస్ శాఖలో కీలక బాధ్యతలు నిర్వహించలేదని...అలాంటి వ్యక్తికి ఏకంగా అత్యంత కీలకమైన కమిషనర్ బాధ్యతలు అప్పగించటంతో సరిగా వ్యవహరించ లేకపోయారనే విమర్శలు వినిపిస్తున్నాయి.  గతంలో నగరంలో రెండుసార్లు బాంబు పేలుళ్లు జరిగాయని... ఆ సమయంలో నగర కమిషనర్‌ను బదిలీ చేయనందున....ఇప్పుడు కూడా అనురాగ్‌శర్మను బదిలీ చేయాల్సిన అవసరం లేదని డీజీపీ దినేష్‌రెడ్డి వాదిస్తున్నారు. కేవలం బాంబు పేలుళ్ల ఘటనను దృష్టిలో పెట్టుకుని నగర కమిషనర్‌ను బ(ది)లీ చేయటం సరికాదని చెబుతున్నారు. అయితే బాంబు పేలుళ్ల ఘటన అనంతరం చేపట్టిన ప్రాథమిక విచారణలోనూ అనురాగ్‌శర్మ సరిగా వ్యవహరించలేకపోయారని భావిస్తున్న కేంద్రం...ఆయన్ను అక్కడ నుంచి తప్పించాల్సిందేనని పట్టుబడుతోంది. బాంబు పేలుళ్లు చోటుచేసుకున్న ప్రాంతాల్లో ఒకటి హైదరాబాద్ కమిషనర్ పరిధిలోకి, మరొకటి సైబరాబాద్ పోలీస్ కమిషనర్ పరిధిలోకి వస్తుంది. అలాంటప్పుడు హైదరాబాద్ కమిషనర్ ఒక్కరినే ఎలా బలిపశువుని చేస్తారని పోలీస్ వర్గాలు వ్యాఖ్యానిస్తున్నాయి.