Posted: 12/01/2012 05:10 PM IST

       నార్వే లో ఉద్యోగం చేసుకోవచ్చంటూ వెళ్లిన భాగ్యనగర దంపతులకు ఓ విచిత్రమైన అనుభూతి ఎదురైంది. అల్లరి చేయొద్దంటూ తమ కుమారుడిని మందలించిన పాపానికి నార్వే దేశంలో కటకటాలు లెక్కిస్తున్నారు. నార్వే ప్రభుత్వ విద్యాలయం నియమావళి వారిపాలిట శపంలా మారి ఆ తల్లిదండ్రులను జైలుపాలు చేసింది.

   దీనికి సంబంధించి ఇవాళ నార్వే పోలీసులు కోర్టులో చార్జిషీట్ దాఖలు చేశారు. బాలుడిని కొట్టిన నేరానికి గాను 18నెలలు తండ్రికి, 15నెలలు తల్లికి జైలు శిక్ష విధించాలని వారు కోర్టుకు విన్నవించారు. కోర్టు తీర్పు మరో రెండు రోజుల్లో అంటే డిసెంబర్ 3న వెలువడుతుంది. దంపతులను జైల్లో పెట్టారని తెలుసుకున్న బంధువులు భారత ప్రభుత్వం కలుగజేసుకుని విడిపించాలని కోరుతున్నారు.

       వివరాల్లోకి వెళితే.. కృష్ణా జిల్లా హనుమాన్ జంక్షన్‌కు చెందిన అనుపమ, గుడివాడ సమీపంలోని దొండపాడుకు చెందిన చంద్రశేఖర్‌లు నగరానికి వచ్చారు. మియాపూర్ ఎ.ఎస్.రాజునగర్‌లోని మృదుల అపార్టుమెంటులో వుంటున్నారు. నాలుగేళ్ల క్రితం టిసిఎల్‌లో ఉద్యోగం రావడంతో నార్వే దేశంలోని ఓస్లో నగరానికి వెళ్లారు. కొడుకు సాయిశ్రీరాం (7), పాప అభినవ (3) వారివెంటే వున్నారు.

       కాగా కొడుకును అక్కడి స్కూల్లో చేర్పించారు. తీసుకెళ్లడానికి తండ్రి వస్తానని చెప్పడంతో స్కూల్లోనే వుండిపోయాడు. వెళ్లిపొమ్మని టీచర్ చెప్పగా తిడతారని చెప్పి అక్కడే ఉండిపోయాడు. మరోసారి యూనిఫాంలో మూత్రం పోసుకోగా ఇంటికి వెళ్లి మార్చుకు రమ్మనడంతో భయపడి వెళ్లలేదు. అనుమానం వచ్చిన టీచర్ అక్కడి ప్రభుత్వ బాలల సంక్షేమ కేంద్రానికి సమాచారం అందించింది. ఆ బాలుడిని వారం రోజులు తమ అధీనంలోనే వుంచుకుని తిరిగి ఇంటికి పంపించారు. అక్కడి ప్రభుత్వ తీరుతో ఆందోళన చెందిన తల్లిదండ్రులు రెండు నెలల క్రితం ఇక్కడికి వచ్చినపుడు వదిలేసి వెళ్లిపోయారు.

       సెప్టెంబర్ 23న భార్యాభర్తలు తిరిగి వెళ్లగా రెండురోజుల క్రితం వారిని అరెస్టుచేసి జైల్లో పెట్టారు. విషయం తెలుసుకున్న చంద్రశేఖర్ తల్లిదండ్రులు లక్ష్మి, సత్యనారాయణ, అనుపమ తల్లిదండ్రులు ప్రసన్న, వీరభద్రం బంధువులు అయోమయంలో పడి ప్రభుత్వాన్ని భారత ప్రభుత్వాన్ని సాయం కోసం అర్థిస్తున్నారు.

...avnk