Posted: 03/30/2012 05:03 PM IST

హైదరాబాద్ మహానగరంలో తాగునీటి కష్టాలు రోజు రోజుకూ తీవ్రం అవుతున్నాయి. ఇప్పటికే నగరంలోని పలు కాలనీలు, బస్తీల్లో ... గుక్కెడు నీళ్ల కోసం జనం తీవ్ర ఇబ్బందులు పడుతున్నారు. నగర శివారు ప్రాంతాలవారికి వారం, పదిరోజులకు ఓసారొచ్చే నల్లా నీటి కోసం రోజంతా క్యూ కడ్తున్నారు. వేసవి కావటంతో.. సమస్య మరింత తీవ్రమైంది. నీటి ఎద్దడిపై దృష్టిపెట్టాల్సిన వాటర్ బోర్డ్‌, నిర్లక్ష్యంగా వ్యవహరిస్తోందని జనం అగ్గిమీద గుగ్గిలమవుతున్నారు. భాగ్యనగరంలోని ఈ కాలని ఆ కాలని అన్న తేడా లేకుండా నీటి కష్టాలు రెట్టింపయ్యాయి. పూట పూటకు తాగునీటి సమస్య తీవ్రమవుతోంది.

గుక్కెడు నీళ్ల కోసం ప్రజలు పడరాని పాట్లు పడుతున్నారు. నగర శివారులోని ఎల్బీనగర్ లో పరిస్థితి మరీ దారుణం. ఎల్బీ నగర్ పరిధిలోని.. మున్సురాబాద్, హరిపురి కాలనీ, బండ్లగూడ, అయ్యప్ప కాలనీ, పత్తుల్లగూడ, సాయి నగర్, బృందావన్ కాలనీ, శక్తి నగర్, ఎన్టీఆర్ నగర్ ప్రజల నీటి కష్టాలు వర్ణాణాతీతం. వారం, పదిరోజులకు ఒక్కసారి వచ్చే మంచినీటి కోసం రోజంతా ఎదురుచూపులే. ఆయా కాలనీలు, బస్తీల్లో ట్యాంకర్ ద్వారా సరఫరా అవుతున్న నీరు కూడా నామమాత్రమే. వచ్చే అరకొర ట్యాంకర్ ముందు బిందెడు నీటికోసం ఆడాళ్లంతా యుద్దం చేయాల్సిన దుస్థితి. గుక్కెడు నీటి కోసం ప్రజలు నానావస్థలు పడుతున్న అధికారులు పట్టించుకున్న పాపాన పోవడం లేదు. అదనంగా 12 మున్సిపాలిటీల విలీనంతో.. GHMCగా రూపాంతరం చెందింది.

అయితే.. 2009లో శివారుప్రాంతాలకు త్రాగునీరు, డ్రైనేజీ, మౌళిక సదుపాయాల కల్పనలో ఎలాంటి కేటాయింపులులేకుండా విలీనం పూర్తిచేసారు. అప్పటినుంచి.. రాష్ట్రం నలు మాలలనుంచి వచ్చే వలసలతో శివారు ప్రాంతాలన్నీ కిక్కిరిసిపోతున్నాయి. ప్రస్తుతం శివారు ప్రాంతాల్లో దాదాపు 40లక్షల ప్రజలు నివసిస్తున్నారు. కానీ.. కనీస అవసరాలు తీర్చడంలో మున్సిపల్ కార్పోరేషన్.. జలమండలి ఆశ్రద్ధ వహిస్తున్నాయి.