బాలయ్య, వెంకీ కొత్త ప్రాజెక్టులు ఆగిపోయాయా?

Posted: 12/27/2016 03:45 PM IST

క్రేజీ దర్శకులు, కొత్త కథలు.. వరుసగా బోల్డ్ నిర్ణయాలతో టాలీవుడ్ లో సంచలనాలకు బాలయ్య నెలవుగా మారాడు. ఇక తన తదుపరి చిత్రం కోసం కూడా ఇలాంటి ప్రయత్నమే చేయబోతున్నాడని ఇంతకు ముందు చెప్పుకున్నాం. క్రియేటివ్ దర్శకుడు కృష్ణ వంశీతో కలిసి 101వ చిత్రం రైతును త్వరలో తెరకెక్కించబోతున్నాడని తెలిసిందే. ఈ సినిమాలో ఓ క్యారెక్టర్ కోసం అమితాబ్ ను (రాష్ట్రపతి పాత్ర) సంప్రదించటం, ఆపై దానిపై సస్పెన్స్ కొనసాగటం తెలిసిందే. అయితే తాజాగా వినిపిస్తున్న గాసిప్ ఏంటంటే.. రైతు సినిమా ఏకంగా ఆగిపోయిందని...

అవును బాలయ్య 101వ చిత్రంగా తెరకెక్కాల్సిన రైతు సినిమా పట్టాలెక్కక ముందే ఆగిపోయిందన్న వార్త టాలీవుడ్ లో హాట్ టాపిక్ గా మారింది. విచిత్రమైన కామెడీతో ఫ్యామిలీ చిత్రాలను నిర్మించే దర్శకుడు కృష్ణారెడ్డి దర్శకత్వంలో తదుపరి చిత్రం ఉండబోతుందన్న వార్త ప్రస్తుతం చక్కర్లు కొడుతోంది. గతంలో వీరిద్దరి కాంబినేషన్ లో టాప్ హీరో సినిమా రాగా, అది కాస్త బాక్సాఫీస్ వద్ద బొక్కా బోర్లాపడింది. అయితే దీనిపై ఎటువంటి అధికారిక ప్రకటన వెలువడలేదు.

ఇక గురు షూటింగ్ లో బిజీగా ఉన్న వెంకీ తన తర్వాతి చిత్రం నేను శైలజ ఫేం తిరుమల కిషోర్ దర్శకత్వంలో ఆడాళ్లు మీకు జోహార్లు అనే చిత్రం చేయబోతున్నాడని ఇది వరకే ప్రకటించారు. నిత్యా మీనన్ హీరోయిన్ గా, మరో ఐదుగురు హీరోయిన్లు కూడా ఇందులో నటించబోతున్నారని, గురు రిలీజ్ తర్వాత రెగ్యులర్ షూటింగ్ కి వెళ్తున్నట్లు ఇది వరకే ప్రకటించారు. అయితే ఉన్నట్లుండి సినిమా ఆగిపోయిందని, వెంకీ పూరి జగన్నాథ్ సురేష్ బాబు దర్శకత్వంలో ఓ సినిమాలో నటించబోతున్నాడనే వార్త ఒకటి చక్కర్లు కొడుతోంది. మరీ ఇద్దరు సీనియర్ హీరోలు అనుకున్న ప్రాజెక్టులను పక్కనబెట్టి కొత్త కథల వెంట పెడుతున్నారా? తెలియాలంటే అఫీషియల్ ప్రకటనలు వచ్చే దాకా ఆగాల్సిందే. అప్పుడే రూమర్లకు చెక్ పడేది.