ఆనంది కోసం అక్కడి దర్శకనిర్మాతల ఆరాటం

Posted: 09/19/2015 01:10 PM IST

‘బస్టాప్’ సినిమాతో తెలుగు తెరకు పరిచయమైన అచ్చతెలుగు అమ్మాయి రక్షితకు మళ్లీ ఏ అవకాశాలు దరిచేరలేదు. అందుకే.. తన అదృష్టాన్ని పరీక్షించుకునేందుకు ఆనందిగా పేరు మార్చుకుని కోలీవుడ్ కి మకాం మార్చేసింది. అక్కడ ఏ ముహూర్తాన అడుగుపెట్టిందో తెలీదు కానీ.. లేటుగా అయినా లేటెస్టుగా ఓ మంచి అవకాశాన్ని దక్కించుకుంది. అంతే.. ఆమె నటించిన ఆ తమిళ చిత్రం ఘనవిజయం సాధించడంతో.. కోలీవుడ్ దర్శకనిర్మాతలు ఈమెను తమ సినిమాల్లో తీసుకోవడం కోసం తెగ ప్రయత్నాలు చేస్తున్నారని సమాచారం.

తెలుగులో ఆఫర్లు కరువైన నేపథ్యంలో రక్షిత తన పేరును ఆనందిగా మార్చుకుని కోలీవుడ్ కి మకాం మార్చింది. అక్కడ కొన్నాళ్లపాటు సినిమా అవకాశాల కోసం ఈ తెలుగమ్మాయి కష్టపడింది. ఈ నేపథ్యంలోనే జీవి ప్రకాష్ జోడీగా ‘త్రిష ఇల్లన నయనతార’ అనే సినిమాలో ఛాన్స్ వచ్చింది. వినాయక చవితి సందర్భంగా విడుదలైన ఈ సినిమా తమిళంలో ఘనవిజయం సాధించింది. ఈ సినిమాలో ఆనంది హాటుగా, హాటుగా నటించి కుర్ర మనసులను దోచేసుకుంది. ఉన్నట్లుండి ఈమె ఫాలోయింగ్ ఒక్కసారిగా పెరిగిపోయింది. దాంతో తమ సినిమాల కోసం ఈమె కోసం దర్శకనిర్మాతల సన్నాహాలు చేస్తున్నట్లు వార్తలొస్తున్నాయి. ఈ నేపథ్యంలోనే ఈమె హవా కోలీవుడ్ లో మొదలైందని టాక్ వినిపిస్తోంది.

AS