మెగాస్టార్ కోసం ‘కత్తి’ని సిద్ధం చేయనున్నారా?

Posted: 09/18/2015 05:28 PM IST

మెగాస్టార్ చిరంజీవి 150వ సినిమా కోసం గతకొద్ది కాలంగా అభిమానులు ఎంతగానో ఎదురుచూస్తున్న విషయం తెలిసిందే. చిరంజీవి 150వ సినిమా పూరీ జగన్నాథ్ దర్శకత్వంలో ‘ఆటోజానీ’ తెరకెక్కనుందని వార్తలొచ్చాయి. కానీ స్ర్కిప్టు విషయంలో సెకండ్ హాఫ్ నచ్చకపోవడంతో ఈ ప్రాజెక్టును పక్కన పెట్టేసారు చిరంజీవి.

అయితే ప్రస్తుతం ఇంకా చిరంజీవి కోసం సరైన కథ దొరకకపోవడంతో తమిళ బ్లాక్ బస్టర్ హిట్ సినిమాను తెలుగులోకి రీమేక్ చేయడానికి సన్నాహాలు చేస్తున్నట్లుగా తెలిసింది. తమిళంలో మురుగదాస్ దర్శకత్వంలో విజయ్ హీరోగా నటించిన ‘కత్తి’ సినిమా రికార్డులు బ్రేక్ చేస్తూ, భారీ విజయం సాధించింది.

ఈ చిత్రాన్ని తెలుగులోకి రీమేక్ చేయడానికి పలువురు స్టార్ హీరోలు అనుకున్నారు. పవన్ కళ్యాణ్, ఎన్టీఆర్ వంటి స్టార్ హీరోలు ఈ సినిమా రీమేక్ లో నటించాలని అనుకున్నారు. కానీ అనివార్య కారణాల వల్ల ఈ ప్రాజెక్టుకు గ్రీన్ సిగ్నల్ ఇవ్వలేకపోయారు. అయితే తాజా సమాచారం ప్రకారం ‘కత్తి’ని తెలుగులోకి చిరంజీవి 150వ సినిమాగా రీమేక్ చేయనున్నట్లుగా తెలిసింది.

గతంలో చిరంజీవి-మురుగదాస్ కాంబినేషన్లో ‘స్టాలిన్’ వంటి భారీ బ్లాక్ బస్టర్ హిట్ చిత్రం తెరకెక్కింది. మరి ‘కత్తి’ చిత్రాన్ని తెలుగులో కూడా మురుగదాస్ దర్శకత్వం వహించే అవకాశాలున్నట్లుగా తెలిసింది. మరి చిరంజీవి 150వ చిత్రానికి ఎలాంటి కథ సిద్దం కాబోతుందో, ఏ దర్శకుడు తీర్చిదిద్దనున్నాడో త్వరలోనే తెలియనుంది.