ఆ హీరోతో ప్రేమలో మునిగితేలుతున్న యామీ

Posted: 06/13/2015 11:10 AM IST

సినిఇండస్ట్రీలో లవ్ ఎఫైర్స్ కామనే కానీ.. వినడానికి ఆసక్తికరంగా వుంటాయి. తమ మధ్య ఏమీ లేవంటూనే చెట్టాపట్టాలేసుకుని తిరిగడం, పార్టీ-పబ్బుల్లో అటెండ్ అయి తమ పర్సనల్ ఫోటోలను అప్ లోడ్ చేయడం, మరికొందరు హద్దులుదాటి ఆలింగనాలు - ముద్దులు చేసుకునే ఫోటోలను తమ సామాజిక మాధ్యమాల్లో పోస్ట్ చేయడం లాంటివి అందరినీ ఆశ్చర్యం కలిగిస్తాయి. ఇప్పుడు ఇదే తరహాలో సినీ అభిమానులను ఆశ్చర్యం కలిగించే ఓ వార్త ఇండస్ట్రీలో చక్కర్లు కొడుతోంది. నటి యామీ గౌతమ్ ఓ బాలీవుడ్ హీరోతో ప్రేమతో మునిగితేలుతుందని బాలీవుడ్ టాక్!

ఒక బుల్లితెర యాడ్ నుంచి కెరీర్ ప్రారంభించిన యామీ గౌతమ్.. అనతికాలంలోనే బాగా పాపులర్ అయింది. చూపరులను కట్టిపడేసే సౌందర్యాన్ని సొంతం చేసుకున్న ఈ అమ్మడు.. ఆ అందంతో దేశవ్యాప్తంగా ఎంతోమంది అభిమానుల్ని తన బుట్టలో పడేసుకుంది. దీంతో ఈమెకు ఇండస్ట్రీ నుంచి ఆఫర్లు వెల్లువెత్తాయి. స్టార్ హోదాకి ఎదగకపోయినా.. వరుసగా చిన్న సినిమాల్లో నటిస్తూ దూసుకుపోతోంది. అయితే.. ఈమెలో కథానాయిక కంటే మోడల్ లక్షణాలే ఎక్కువ వున్న నేపథ్యంలో అభిమానులతోపాటు ఇండస్ట్రీలో వున్నవారంతా బాగా ఆకర్షించబడుతున్నారు. ఈ క్రమంలోనే ఓ బాలీవుడ్ హీరో ఈమె మాయలో పడిపోయినట్లు సమాచారం! ఆ హీరో ఎవరో తెలియాలంటే.. మేటర్ లోకి వెళ్లాల్సిందే!

యామీ గౌతమ్ తాజాగా ‘సనమ్ రే’ అనే బాలీవుడ్ చిత్రంలో నటిస్తోంది. ఈ సినిమాలో ఈ అమ్మడు హీరో పుల్ కిత్ సామ్రాట్ తో జోడి కట్టింది. ఈ షూటింగ్ నేపథ్యంలో వీరిద్దరి మనసులు కలిశాయని చెప్పుకుంటున్నారు. ఎందుకంటే.. ప్రస్తుతం ఈ జోడీ ఎక్కడ చూసినా చెట్టాపట్టాలేసుకుని కనిపిస్తున్నారు. పార్టీ-పబ్బుల్లో ఎంజాయ్ చేస్తూ ఫోటోలకు పోజులివ్వడం, రహస్యంగా కలుసుకోవడం, అప్పుడప్పుడు రెస్టారెంట్లలో కలుసుకోవడం లాంటి విషయాలు ఒక్కొక్కటిగా బయటపడుతున్నాయి. దీంతో వీరిద్దరు ప్రేమలో బాగానే మునిగితేలుతున్నారని చెప్పుకుంటున్నారు. మరి.. ఇది నిజమో కాదో తెలియాలంటే ఎవరో ఒకరు స్పందించాల్సిందే!