ఈసారి నయనతార పెళ్లి ఫిక్సేనటా?

Posted: 06/12/2015 11:20 AM IST

ఇండస్ట్రీలో వున్న హీరోయిన్లందరిలోనూ వివాదాలకు కేరాఫ్ అడ్రస్ ఎవరంటే.. ప్రతిఒక్కరు తడుముకోకుండా ‘నయనతార’ పేరు చెప్పేస్తారు. ఎందుకంటే.. ఈమె నిజజీవిత ప్రేమవ్యవహారాల్లో నిత్యం వార్తల్లో నిలిచిన తంతు తెలిసిందే! ఆమధ్య శింబుతో, తర్వాత ప్రభుదేవా వంటి స్టార్లతో లవ్ బ్రేకప్స్ తోపాటు ఎన్నో గాసిప్స్ కి ఈమె కేంద్రబిందువు అయ్యింది. అందుకే.. పరిశ్రమలోనే ఈమెకు వివాదాస్పద నటిగా గుర్తింపు వచ్చింది. కెరీర్ పరంగా బరువైన పాత్రలో పోషించడంతోపాటు సక్సెస్ ఫుల్ దూసుకుపోతున్న ఈమెపై ఇప్పటికీ ప్రచారాలు వస్తూనే వున్నాయి. ఈ క్రమంలోనే తాజాగా ఈమె పెళ్లికి సంబంధించి మరో చక్కర్లు కొడుతోంది.

ఇటీవలే నయన దర్శకుడు విఘ్నేష్ తో ప్రేమాయణం నడుపుతోందని, అతన్నే వివాహం చేసుకోనుందని వార్తలొచ్చిన విషయం తెలిసిందే! అయితే.. ఆ వార్తలను వాళ్లిద్దరూ అప్పుడే ఖండించారు. తాము కేవలం స్నేహితులం మాత్రమేనని, తమమధ్య ఎటువంటి ప్రేమ లేదని వారు స్పష్టం చేశారు. కానీ.. వారిద్దరి మధ్య ఇప్పటికీ ‘సంథింగ్ సంథింగ్’ నడుస్తోందని కోలీవుడ్ లో చెప్పుకుంటున్నారు. వారిద్దరూ రహస్యంగా తమ ప్రేమాయణం నడుపుతున్నారనీ.. నలుగురికి కనిపించకుండా చక్కర్లు కొడుతున్నారని చెప్పుకుంటున్నారు. ప్రస్తుతం వీరిద్దరు కలిసి చేస్తున్న ‘నానుమ్ రౌడీదాన్’ చిత్రం చిత్రీకరణ చివరిదశలో వుంది. త్వరలోనే ఈ సినిమా పాటలకు విడుదల చేసేందుకు సన్నద్ధమవుతున్నారు. ఆ పాటల వేడుకలో.. వీరి ప్రేమకు శుభంకార్డు పడనుందని కొత్తగా ప్రచారం ఊపందుకుంది. ఆ వేడుకలో తమ పెళ్లిపై నయనతార ఓ ప్రకటన చేయడానికి సిద్ధమైందని సన్నిహిత వర్గాలు చెప్పుకుంటున్నాయి.

ఇప్పటికే విఘ్నేష్, నయన తమ పెళ్లి వార్త గురించి ఆ వేడుకలో చెప్పేందుకు రెడీ అయ్యారని కోలీవుడ్ లో టాక్ వినిపిస్తోంది. దీంతో త్వరలో జరగబోయే ‘నానుమ్ రౌడీదాన్’ ఆడియో వేడుక కోసం కోలీవుడ్ జనమంతా ఆసక్తిగా ఎదురుచూస్తున్నారు. మరి.. ఈ వేడుకలో నయన తన పెళ్లిపై ఏ విధంగా కామెంట్ చేయనుందో వేచి చూడాల్సిందే!