బాబోయ్... ఎన్టీఆర్ స్టైలిష్ న్యూ లుక్ ఇదేనా?

Posted: 05/07/2015 12:17 PM IST

‘టెంపర్’ వంటి భారీ హిట్ చిత్రం తర్వాత యంగ్ టైగర్ ఎన్టీఆర్ హీరోగా ప్రముఖ దర్శకుడు సుకుమార్ దర్శకత్వంలో ఓ చిత్రం తెరకెక్కుతున్న విషయం తెలిసిందే. శ్రీ వెంకటేశ్వర సినీచిత్ర ఇండియా లిమిటెడ్‌ పతాకంపై నిర్మాత బి.వి.ఎస్‌.ఎన్‌.ప్రసాద్‌ నిర్మిస్తున్న ఈ చిత్రానికి దేవిశ్రీప్రసాద్ సంగీతం అందిస్తున్నారు. ఇటీవలే లండన్ లో షూటింగ్ ప్రారంభమయ్యింది.

ఈ సినిమాలో ఎన్టీఆర్ ను సుకుమార్ చాలా స్టైలిష్ గా చూపించబోతున్నాడని గతకొద్ది రోజులుగా వార్తలొస్తూనే వున్న విషయం తెలిసిందే. అయితే ఎన్టీఆర్ ఇదివరకే ‘టెంపర్’ సినిమాలో చాలా స్టైలిష్ గా కనిపించాడు. ఇంతకంటే స్టైలిష్ గా అంటే ఎలా వుండబోతున్నాడా అని అభిమానుల్లో ఒకటే ఉత్కంఠ నెలకొంది. కానీ ఇందుకు భిన్నంగా ఎన్టీఆర్ కొత్తలుక్ తో దర్శనమిచ్చి షాకిచ్చాడు.

తాజాగా నందమూరి జానకీరామ్ తనయుడు మాస్టర్ ఎన్టీఆర్ నటిస్తున్న ‘దానవీరశూరకర్ణ’ చిత్ర ఆడియో విడుదల కార్యక్రమం జరిగింది. ఈ కార్యక్రమానికి ఎన్టీఆర్, కళ్యాణ్ రామ్ లు ముఖ్య అతిథులుగా విచ్చేసారు. ఇక్కడ ఎన్టీఆర్ ను చూసిన వాళ్లంతా ఒక్కసారిగా షాకయ్యారు.

ఎన్టీఆర్ తన స్టైలిష్ లుక్ ను పక్కన పెట్టేసి, బాగా గడ్డం పెంచేసి ఓ దేవదాసులా తయారయ్యాడు. మరి ఈ లుక్ సుకుమార్ సినిమాకోసమేమో అని అందరూ భావిస్తున్నారు. ఒకవేళ సుకుమార్ సినిమాలోని ఎన్టీఆర్ లుక్ ఇదే అయితే... ఇక సినిమా ఎలా వుండబోతుందో... సుకుమార్ ఎలాంటి ప్రయోగాలు చేయబోతున్నాడోనని నందమూరి అభిమానులు మరింత కంగారు పడుతున్నారు.

ప్రస్తుతం ఈ చిత్ర షూటింగ్ శరవేగంగా జరుగుతోంది. ఎన్టీఆర్ సరసన తొలిసారిగా రకూల్ ప్రీత్ సింగ్ హీరోయిన్ గా నటిస్తుంది. అలాగే ప్రముఖ నటుడు జగపతి బాబు ఇందులో ఓ ముఖ్య పాత్రలో నటిస్తున్నారు. ఈ చిత్రానికి ‘నాన్నకు ప్రేమతో’ అనే టైటిల్ పరిశీలిస్తున్నట్లుగా తెలిసింది. త్వరలోనే అన్ని వివరాలు అధికారికంగా ప్రకటించనున్నారు.