Posted: 08/22/2012 09:19 PM IST

హైదరాబాద్ మణికట్టు మాంత్రికుడు వీవీఎస్ లక్ష్మణ్ కి, భారత క్రికెట్ జట్టు కెప్టెన్ మహేంద్ర సింగ్ ధోనికి మధ్య విభేధాలు తారా స్థాయిలో ఉన్నాయనే విషయం తాజాగా లక్ష్మణ్ నిన్న ఇచ్చిన విందు ద్వారా బయటపడింది. హైదరాబాద్ మణికట్టు మాంత్రికుడు వివియస్ లక్ష్మణ్ ధోనీ తీరుపై అసంతృప్తితోనే రిటైర్మెంట్ ప్రకటించారనే ఊహాగానాలు చెలరేగుతూ వస్తున్నాయి.  గత రాత్రి జరిగిన సంఘటన వీటికి మరింత ఆజ్యం పోసింది. మంగళవారం రాత్రి పొద్దుపోయిన తర్వాత తన నివాసంలో లక్ష్మణ్ ఇచ్చిన విందుకు ధోనికి ఆహ్వనించనట్టు సమాచారం. న్యూజిలాండ్ తో జరుగనున్న రెండు టెస్ట్ ల సిరీస్ లక్ష్మణ్ ఎంపికైనప్పటికి.. వివాదస్పద పరిస్థితుల నడుమ క్రికెట్ కు వీవీఎస్ గుడ్ బై చెప్పిన సంగతి తెలిసిందే. హైదరాబాద్ లో మణికొండలోని తన నివాసంలో క్రికెటర్లకు ఏర్పాటు చేసిన విందుకు సచిన్ టెండూల్కర్, వీరేంద్ర సెహ్వగ్, గౌతమ్ గంభీర్, జహీర్ ఖాన్ లు హాజరయ్యారు. లక్ష్మణ్ ఏర్పాటు చేసిన విందుకు ధోని హాజరుకాక పోవడం క్రికెట్ వర్గాల్లో చర్చనీయాంశమైంది.

అయితే దీని పై స్పందించిన ధోని  వీవీఎస్ లక్ష్మణ్ రిటైర్మెంట్ కు సంబంధించిన సమాచారానికి తాను అందుబాటులో లేనన్న వార్త నిజమేనని, లక్ష్మణ్‌ రిటైర్మెంట్‌కు సంబంధించిన కారణాలు తనకు తెలియదని ధోని తెలిపాడు. అంతేకాక గత రాత్రి లక్ష్మణ్ ఇచ్చిన విందుకు తనకు ఆహ్వానం అందలేదని ధోని స్పష్టం చేశారు. అయితే ధోని లక్ష్మణ్ రిటైర్మెంట్ కావాలనే అందుబాటులో లేడని, లక్ష్మణ్ కూడా కావాలనే విందుకు ఆహ్వానించలేదని క్రికెట్ వర్గాలు అంటున్నారు. మరి ఈ వివాదం ఇంతటితో సమసిపోతుందో... లేక ఇంకా అగ్గి రాజుకుంటుందో చూడాలి.