Posted: 01/31/2012 08:24 PM IST

ఇప్పడు మావోయిస్టు నేతలు అడవుల్లో జీవించటంలేదట. వారు కూడా విలాసాలకు అలవాటు పడుతున్నారట. వారు విలాసాంగా జీవించాలని వారు కోరుకుంటున్నారట. దశాబ్దంపాటు గెరిల్లా పోరాటం, 16 వేలమంది బలిదానాలతో నేపాల్ రాచరికాన్ని గద్దె దింపి.. దేశాన్ని ప్రజాస్వామ్య పథం పట్టించిన మావోయిస్టు నేత పుష్పకమల్ దహాల్ అలియాస్ ప్రచండ అప్రతిష్ట పాలయ్యారు. సామ్యవాదం, సిద్ధాంతాలు అంటూ ప్రజల విలాసాలను ప్రశ్నించే కమ్యూనిస్టుగా ఉన్న ఆయనే విలాసాల కోసం పాకులాడుతున్నారన్న అపప్రథకు గురయ్యారు. కఠ్మాండులోని తన పాత ఇంటి నుంచి ప్రచండ విలాసవంతమైన భవంతిలోకి మకాం మార్చడంతో దేశవ్యాప్తంగా విమర్శలు వెల్లువెత్తాయి. భవంతి 16,000 చదరపు అడుగుల విస్తీర్ణంలో ఉందని, 15 గదులు, విశాలమైన పార్కింగ్ స్థలం, టేబుల్ టెన్నిస్ గది ఉన్నట్లు ప్రచండ వ్యక్తిగత సహాయకుడు తెలిపారు. భద్రత కోసం 70 మంది సిబ్బందిని నియమించారన్నారు. 

కొత్త భవంతి వల్ల మావోయిస్టు పార్టీకి నెలకు రూ. లక్ష మాత్రమే అద్దె ఖర్చవుతోందని, భద్రతాపరమైన కారణాల వల్లే ఇక్కడికి మారినట్లు చెప్పారు. కాగా రెండు చీకటి గదుల్లో నివసిస్తూ కాలంగడుపుతున్న ప్రజలు కమ్యూనిస్టుల యోగ్యతలను ప్రశ్నించక తప్పదని ‘రిపబ్లికా’ పత్రిక పేర్కొందట. మావోయిస్టులు సామ్యవాదం నుంచి దారితప్పారని మాజీ మావోయిస్టు, రాజకీయ విశ్లేషకుడు ముమరాం ఖనాల్ వ్యాఖ్యానించారు. సాధారణ రైతు కుటుంబంలో పుట్టి దేశ ప్రధానిగా ఎదిగిన ప్రచండకు విలాసవంతమైన జీవనశైలి, మంచి ఆహారం పట్ల ఆసక్తి ఉందని, యువకుడిగా ఉన్నప్పుడు ఆయన వాటిని పొందలేక పోవడం వల్లే ఆయన ఇప్పుడు ఆకర్షితులై ఉంటారన్నారు..