‘కేరింత’ కోసం హీరోయిన్లను మార్చేస్తున్నారట!

Posted: 01/07/2015 12:58 PM IST

సాధారణంగా ఓ మూవీ స్టార్ట్ చేస్తున్నారంటే.. ఆ మూవీకి కావాల్సిన క్యాస్టింగ్ కార్యక్రమాలను ముందుగా కొనసాగిస్తున్నారు. అందులో ముఖ్యంగా హీరోయిన్ల ఎంపిక విషయంలో అయితే మరీ జాగ్రత్తగా వ్యవహరించి సెలెక్ట్ చేసుకుంటారు. ఇలా ఏ మూవీకి అయినా ముందుగా అందరినీ ఎంపిక చేసుకున్న తర్వాత షూటింగ్ ప్రారంభిస్తారు. కానీ.. ‘కేరింత’ మూవీ విషయంలో మాత్రం అలా కాదు.. తమకు నచ్చిన హీరోయిన్లను సెలెక్ట్ చేసి, వారితో కొన్ని షూట్ చేసిన తర్వాత కూడా అందుకు సరిపోవడం లేదంటూ వరుసగా మార్చుకుంటూ పోతున్నారని సమాచారం!

టాలీవుడ్ అగ్రనిర్మాత దిల్’రాజు, సాయి కిరణ్ అడివి దర్శకత్వంలో ‘కేరింత’ చిత్రం రూపొందుతోంది. ప్రస్తుతం వున్న టీనేజీ కుర్రకారులు ఎలాంటి సమస్యల్ని ఎదుర్కొంటున్నారన్న కథాంశంతో తెరకెక్కిస్తున్నారు. అంతా కొత్త తారలతోనే చిత్రీకరణ మొదలుపెట్టేసి చాలాకాలమే అవుతోంది. కానీ.. కథానాయిక విషయంలో మాత్రం సరిగ్గా క్లారిటీ లేకపోవడం వల్ల ఇప్పటికే ముగ్గురు హీరోయిన్లను మార్చేశారట! మొదట్లో అవంతిక అనే కథానాయికను ఎంపిక చేసుకున్నారు. స్ర్కీన్ టెస్ట్ కూడా చేశారు. కానీ.. ఆమె ఆ పాత్రకు సరిపోదని బావించి తీసేశారు. తర్వాత ‘అందాల రాక్షసి’ ఫేం లావణ్య త్రిపాఠిని ఎంపిక చేసుకుని, కొంతకాలం షూటింగ్ కూడా చేశారు. అయితే.. ఆమె కూడా ఆ పాత్రకు సరిపోవడం లేదని భావించి ఆమెను తీసేశారు.

ఇక చివరగా ‘దృశ్యం’ ఫేం కృతికను కథానాయికగా తీసుకున్నారు. కొన్ని సీన్లు కూడా షూట్ చేసినట్లు యూనిట్ సమాచారం. కానీ ఈ భామ కూడా ఆ సినిమా నుంచి తప్పుకుందని ప్రచారాలు కొనసాగుతున్నాయి. మరోవైపు.. ఆ మూవీ కోసం ఇంకా కథానాయిక వేట కొనసాగుతూనే వుందని అంటున్నారు. షూటింగ్ ప్రారంభించి చాలాకాలమే అయినా.. తమ కథలోని పాత్రకు తగ్గట్టు సరైన కథానాయిక దొరక్కపోవడంతో దర్శకనిర్మాతలు తర్జనభర్జన అవుతున్నారట! మరి.. వీరికి ఆ నాయిక ఎప్పుడు దొరుకుతుందో వేచి చూడాల్సిందే!