Posted: 01/24/2012 12:11 PM IST

          బహుముఖ ప్రజ్ఞాశాలైన భారత జాతీయ నటుడు కమల్ హాసన్. అతను నటించే ప్రతి చిత్రమూ ఓ విభిన్నమే. ఇదే విషయం రుజువు చేస్తాయి అతని చిత్రాలు. ప్రస్తుతం ‘విశ్వరూపం’ చిత్రంతో తన నటనా విశ్వరూపాన్ని మరోమారు సరికొత్తగా ప్రేక్షకులముందు పెట్టాలని కమల్ ఉవ్విళ్లూరుతోన్న సంగతి విదితమే. ఇదిలా ఉంటే ఈ చిత్రం అనంతరం మరో సందేశాత్మక చిత్రం తీసేందుకు ఆయన రెడీ అయిపోతున్నట్టు తెలుస్తోంది.

          ఈ ధఫా అవినీతిపై సమరశంఖం పూరించేందుకు కమల్ హాసన్ సంసిద్ధులవుతున్నారు. గతంలో ఇదే అంశంపై ప్రముఖ దర్శకుడు శంకర్ రూపొందించిన ‘భారతీయుడు’ సినిమా ప్రేక్షకుల గుండెల్లో చెరగని ముద్రవేసిన సంగతి తెలిసిందే. అయితే ఇప్పుడు తాజాగా అవినీతిపై మరింత లోతుగా ఈ చిత్రం ఉండబోతుందని చిత్రవర్గాల సమాచారం.

          ద్విభాషా చిత్రంగా రూపొందించాలని తలుస్తోన్న ఈ సినిమా దేశంలో ఎంత అవినీతి బట్టబయలవుతోన్నాకాని, అవినీతి పరులపై తీవ్రస్థాయిలో దండన ఉండటంలేదనే కథాంశంతో రూపొందిస్తారని వెల్లడి. ప్రస్తుతానికి కమల్ హాసన్ తానే దర్శకత్వం వహించి నటిస్తోన్న‘విశ్వరూపం’ చిత్రం తుదిదశ పనుల్లో బిజీబిజీగా ఉన్నారు. ఆ మూవీ అనంతరం అవినీతి ప్రక్షాళనకు సంబంధించిన చిత్రం గురించి అధికారిక ప్రకటన వెలువడే అవకాశం ఉంది.

…avnk