Posted: 01/24/2012 11:36 AM IST

          చరిత్ర సృష్టించబోతుందా రాజమౌళి ‘ఈగ’ అంటుంటే అవుననే అంటున్నాయి. పరిశ్రమ వర్గాలు. మూస ధోరణికి ఫుల్ స్టాప్ పెట్టేలా ఈ చిత్రం రూపొందుతోందని చిత్ర యూనిట్ అంటోంది. తెలుగు చలన చిత్ర చరిత్రను తిరగరాసేలా ‘మగథీర’ చిత్రాన్ని ఎంతో సాహసోపేతంగా తెరకెక్కించారు ద గ్రేట్ డైరెక్టర్ రాజమౌళి. ఈ చిత్రం టాలీవుడ్ లోనే కాదు యావత్ దక్షిణాది సినిమానే కొత్త పుంతలు తొక్కించిన సంగతి తెలిసిందే. ఇక ఇప్పుడు రాజమౌళి అదే ధీమా, విశ్వాసంతో రూపొందిస్తున్నారు ‘ఈగ’ సినిమా.

          యావత్ ప్రపంచాన్నే తన వైపు తిప్పుకున్న హాలీవుడ్ మూవీ ‘అవతార్’ స్థాయిలో ఈ చిత్రం నిలుస్తుందని విశ్వసనీయ వర్గాలంటున్నాయి. ఇది ఒక ప్రయోగాత్మక మూవీ అని చిత్ర షూటింగ్ ప్రారంభంలో స్వయంగా రాజమౌళి వెల్లడించిన సంగతి గుర్తుండే ఉంటుంది. ఈ చిత్రంలో కంప్యూటర్ గ్రాఫిక్స్ తారాస్థాయిలో ఉండబోతున్నాయి. అలా అని ఇది యానిమేషన్ మూవీ మాత్రం కాదు. ఇది ఒక ప్రత్యక్ష యాక్షన్ మూవీగా ఉండబోతుందని తెలుస్తోంది. ఈ చిత్రంలో ఈగ ప్రధాన భూమిక వహించబోతుంది. విలన్ చేతిలో హతుడైన హీరో ఈగగా పునర్జన్మెత్తి పగతీర్చుకోవటం ఈ సినిమా ప్రధానాంశం.

          ప్రముఖ దర్శకుడు రామ్ గోపాల్ వర్మ హిందీలో నిర్మించిన ఫూంక్, రక్తచరిత్ర 1,2 లలో నటించిన సుదీప్ ఈ సినిమాతో తెలుగులో ఫుల్ ప్లెడ్జ్ డ్ గా నటిస్తున్నారు. నాని, సమంతా లీడ్ రోల్స్ కాగా, సుదీప్ నెగెటివ్ రోల్ చేస్తున్నారు, సంతానం తదితరులు ఇతర ప్రధాన తారాగణం.

…avnk