పవన్ ఇప్పుడు నోరెందుకు విప్పడం లేదు : వీహెచ్

Posted: 06/20/2015 03:24 PM IST

Congress mp hanumantha rao questioned pawan kalyan over vote for note controversy

అవినీతి జరిగిన సందర్భంలో తాను ప్రజల తరఫున ప్రశ్నిస్తానని పవర్ స్టార్, జనసేనాధిపతి పవన్ కల్యాణ్ వెల్లడించిన విషయం తెలిసిందే! ఆయన చెప్పినట్లుగానే కొన్ని సందర్భాల్లో ఇటు తెలంగాణ, అటు ఆంధ్రరాష్ట్ర ప్రభుత్వాలను ప్రశ్నించారు. ముఖ్యంగా ఏపీలో ఆమధ్య రాజధాని విషయమై చెలరేగిన వివాదాలపై పవన్ నేరుగా రైతులతో కొద్దిసేపు మంతనాలు జరిపారు. అలాగే రాష్ట్రప్రభుత్వాన్ని పలు సందర్భాల్లో ప్రశ్నించారు కూడా! కానీ.. ఇప్పుడు తన సినిమా విషయంలో బిజీగా వుండటంతో పవన్ రాజకీయ వ్యవహారాలపై ఏమాత్రం స్పందించడం లేదు.

ప్రస్తుతం రెండు తెలుగురాష్ట్రాల్లో తీవ్ర కలకలం రేపుతున్న ‘ఓటుకు నోటు’ వ్యవహారంపై ఆయన నోరు మెదపకపోవడంపై విమర్శలు వచ్చిపడుతున్నాయి. ఇప్పటికే దర్శకనిర్మాత రాంగోపాల్ వర్మ ట్విటర్ వేదికగా పవన్ ను ఉద్దేశించి సంచలన వ్యాఖ్యలు చేయగా.. ఇప్పుడు తాజాగా సీనియర్ నేత వి.హనుమంతరావు ప్రశ్నించారు. అవినీతిని ప్రశ్నిస్తానని హీరో పవన్.. ఇప్పుడు రెంగు రాష్ట్రాల రాజకీయ వివాదంపై ఎందుకు నోరు విప్పడం లేదని ఆయన అడిగారు. ఎమ్మెల్సీ ఎన్నికల నేపథ్యంలో సీఎం చంద్రబాబు ఎమ్మెల్యేలను కొనుగోలు చేయడం తప్పో, ఒప్పో పవన్ చెప్పాలని ఆయన డిమాండ్ చేశారు. మరి.. వీహెచ్ సంధించిన ప్రశ్నలపై పవన్ స్పందిస్తాడా? లేదా? అన్నది వేచి చూడాల్సిందే!

పవన్ పై ప్రశ్నలు సంధించిన తర్వాత ఆయన చంద్రబాబు మీద విరుచుకుపడ్డారు. ఓటుకు నోటు కేసు నుంచి బయటపడేందుకు బాబు కౌంటర్ ఎటాక్ మొదలుపెట్టారని, ఓ రాష్ట్రానికి సీఎంగా వుండి ఇలాంటి చర్యలకు పాల్పడటం సరికాదని వీహెచ్ అన్నారు. మరి.. ఈయన చేసిన ఈ కామెంట్లపై టీడీపీ వర్గాలు ఏ విధంగా సమాధానమిస్తాయో వేచి చూడాల్సిందే!