ఊపిరి సలపని పని వుందండి మాకు : కేటీఆర్

Posted: 06/18/2015 12:56 PM IST

Ktr latest press meet on vote for note controversy after venkaiah naidu meeting

ప్రస్తుతం రెండు తెలుగు రాష్ట్రాల్లో ‘ఓటుకు నోటు’ వ్యవహారం తీవ్ర సంచలనం సృష్టిస్తున్న విషయం తెలిసిందే! ఇటు తెలంగాణ ప్రభుత్వం ఏపీ సీఎం చంద్రబాబుపై కేసు పెట్టేందుకు రంగం సిద్ధం చేసుకుంటుండగా.. అటు ఏపీ ప్రభుత్వం కూడా కేసీఆర్ గత కేసులపై విచారణ చేసేందుకు అన్ని ఏర్పాట్లు చేసుకుంది. అంతేకాదు.. కేటీఆర్ టీఆర్ఎస్ పార్టీ చేరాలని ఒత్తిడి చేస్తున్నారని, అందుకు తమ పార్టీ నిధులు కూడా ఇస్తుందని తమను ప్రలోభ పెట్టేందుకు ప్రయత్నిస్తున్నారని కొందరు టీడీపీ ఎమ్మెల్యేలు ఆయనపై కేసు పెట్టేందుకు నిర్ణయం తీసుకున్నారు. ఇలా ‘ఓటుకు నోటు’ వ్యవహారం ఎన్నో సంచలనాలకు దారితీసింది.

ఇదిలావుండగా.. ఈ ఓటుకు నోటు వ్యవహారంపై తాజాగా తెలంగాణ పంచాయితీరాజ్ శాఖ మంత్రి కేటీఆర్ కొన్ని ఆసక్తికరమైన వ్యాఖ్యలు చేశారు. ఓటుకు నోటు కేసులో టీడీపీ నేతల తీరును ఎండగడుతూనే.. తమకు ఊపిరి సలపని పని వుందని ఆయన అన్నారు. ఢిల్లీ పర్యటనకు వచ్చిన కేసీఆర్.. కేంద్ర పట్టణాభివృద్ధి శాఖ మంత్రి వెంకయ్యనాయుడితో భేటీ అయ్యారు. ఆయనతో భేటీ అనంతరం మీడియాతో మాట్లాడిన కేటీఆర్.. నిత్యం వివాదాస్పద అంశాలపై మాట్లాడేంత తీరిక తమకు లేదని ప్రకటించారు. రాష్ట్రంలో పలు అభివృద్ధి చేయాల్సి వుందని.. ఆ పనిలోనే తామంతా నిమగ్నమై వున్నామని, ఓటుకు నోటు వ్యవహారంపై మాట్లాడేంత సమయంల లేదని కేటీఆర్ తెలిపారు.

ఓటుకు నోటు కేసుపై మీడియా పలుమార్లు సంధించిన ప్రశ్నలకు సంధించిన కేటీఆర్.. ‘మా పనిలో మేమున్నాం.. చట్టం తన పని తాను చేసుకుపోతుంది’ అని జవాబిచ్చారు. టీడీపీ నేతలు తప్పు చేయడమేగాక ఆ బురదను మిగిలినవారికి అంటించేందుకు ప్రయత్నిస్తున్నారని ఆయన ఆరోపించారు. వెంకయ్య భేటీలో భాగంగా మెదక్ జిల్లా సిద్దిపేటకు క్లాస్-1 హోదాపై హామీ లభించిందని ఆయన స్పష్టం చేశారు.