ఉపాధి కావాలా నాయనా : బాబు

Posted: 05/01/2015 01:17 PM IST

ఇప్పటికే ఆర్థికపరంగా ఎన్నో ఇబ్బందులు ఎదుర్కొంటున్న ఆంధ్రరాష్ట్రంలో ఉపాధి కష్టాలు వెంటాడుతున్నాయి. ఎందరో నిరుద్యోగులు ఉపాధి అవకాశాలు కోసం కాపు కాస్తున్నారు. ఈ విషయంలో ఏపీ ప్రభుత్వం తనవంతు కృషి చేస్తోంది. ఇప్పటికే రాష్ట్రాభివృద్ధి కోసం సీఎం చంద్రబాబు అభివృద్ధి చెందిన దేశాల్లో పర్యటిస్తూ.. అక్కడి సంస్థలతో మంతనాలు జరుపుతున్నారు. తమ రాష్ట్రంలో ఎన్నో సంస్థలు నిర్మించుకోవచ్చని వారిని బహిరంగంగా ఆహ్వానిస్తున్నారు. ఇలా సంస్థలు రాష్ట్రంలో వస్తే.. నిరుద్యోగులకు ఉపాధి లభించడంతోపాటు రాష్ట్రం ఆర్థికంగా వృద్ధి చెందుతుందన్న ఉద్దేశంతో ఆయన ఆ మేరకు పావులు కదుపుతున్నారు.

రాష్ట్రంలో ఉపాధిని వృద్ధి చేసే పనిలో తాను నిరంతరం శ్రమిస్తున్నట్లుగా చంద్రబాబు పేర్కొన్నారు. ఈ విషయమై ఆయన మాట్లాడుతూ.. రాష్ట్రంలో ఉపాధి కావాలంటే పర్యాటక రంగం అభివృద్ధి చెందాలని అన్నారు. కాకినాడలో జరిగిన సభలో బాబు మాట్లాడుతూ.. రాష్ట్రంలో పర్యాటక ఎంత త్వరగా అభివృద్ధి చెందితే అంతే వేగంగా ఉపాధి అవకాశాలు పెరుగుతాయని అన్నారు. పర్యాటకరంగానికి ఏపీ ఎంతో అనుకూలమైందన్నారు. అలాగే.. హైదరాబాద్‌ లాంటి నగరాలు ఏపీలో నాలుగు అభివృద్ధి చేస్తానని ప్రకటించారు. ప్రపంచంలో అన్ని దేశాలు మనవైపు చూస్తున్నాయన్నారు. పుష్కరాలను బ్రహ్మాండంగా నిర్వహిస్తామని చంద్రబాబు చెప్పారు.

AS