వాజ్ పేయికి భారతరత్న ఎలా ఇచ్చారు?

Posted: 05/04/2015 07:40 PM IST

ఎంఐఎం పార్టీ అధినేత అసదుద్దీన్ ఒవైసీ అప్పుడప్పుడు వివాదాస్పద వ్యాఖ్యలు చేస్తూ సంచలనాలు సృష్టిస్తున్నారు. ముఖ్యంగా బీజేపీ పార్టీమీద, ఆ పార్టీ నేతలమీద ఈరచూ ఆరోపణలు సంధిస్తుంటారు. ఇక ప్రధాని మోడీని సైతం ఈయన ఏమాత్రం వదలపెట్టకుండా తమ వాక్చాతుర్యంతో విమర్శనాస్త్రాలు గుప్పిస్తారు. ఇప్పుడు తాజాగా ఈయన మరో వివాదంతో మళ్లీ వార్తల్లోకెక్కారు.

ఇటీవలే ప్రధాని మోడీ ప్రభుత్వం బీజేపీ సీనియర్ నేత, మాజీ ప్రధానమంత్రి అటల్ బిహారీ వాజ్ పేయికి అత్యంత అత్యున్నత పురస్కారమైన ‘భారతరత్న’ ఇచ్చిన విషయం విదితమే! ఈ వ్యవహారం మీద తాజాగా అసదుద్దీన్ తనదైన రీతిలో బీజేపీ ప్రభుత్వంపై ప్రశ్నలదాడి కురిపించారు. వాజ్ పేయికి భారతరత్న ఇవ్వడాన్ని ఆయన తప్పుపట్టారు. బాబ్రీ మసీదు కూల్చివేతలో వాజ్ పేయికి భాగముందని.. అటువంటి పెద్ద వివాదంలో పేరున్న ఆ వ్యక్తికి ఆ అత్యున్నత పురస్కారం ఇవ్వడం తగదని ఆయన అన్నారు.

అంతేకాదు.. బీజేపీకే చెందిన మరో అగ్రనేత ఎల్కే అద్వానీకి పద్మవిభూషణ ప్రకటించడాన్ని అసద్ ప్రశ్నించారు. ఆయనక్కూడా బాబ్రీ మసీదు కూల్చివేతలో భాగముందని.. అటువంటి అద్వానీకి విభూషణ ఇవ్వడంలో లాజిక్ ఏంటో తనకు అర్థం కావడం లేదని అన్నారు. మరి.. ఈ విధంగా అసదుద్దీన్ ప్రశ్నించడంపై ఎన్ని వివాదాలు తెరమీదికొస్తాయో వేచి చూడాల్సిందే!