విభజన పై ఇంటెలిజెన్స్ బ్యూరో చీఫ్ హెచ్చరిక

Posted: 11/21/2013 04:37 PM IST

రాష్ట్ర విభజన ఏర్పాటు జరిగితే.. దేశానికి ప్రమాదం ఉందని ఇంటెలిజెన్స్ బ్యూరో చీఫ్ హెచ్చరించారు. ఈరోజు జరిగిన సమావేశలో తెలంగాణ రాష్ట్ర ఏర్పాటుపై ఇంటెలిజెన్స్ బ్యూరో, డీజీపీ, ఐజీల సమావేశం నిర్వహించింది. ఇందులో ఐబీ చీఫ్ ఇబ్రహీం కీలక వ్యాఖ్యలు చేశారు. తెలంగాణ రాష్ట్ర ఏర్పాటు దేశ భద్రతకు ముప్పుగా మారే అవకాశముందని ఆయన హెచ్చరించారు.

 

ఒకవైపు కేంద్ర ప్రభుత్వం తెలంగాణా ప్రక్రియపై శరవేగంతో ముందుకు వెళ్తుండగా కేంద్ర ఇంటెలిజెన్స్ బ్యూరో చీఫ్ ఇబ్రహీం ఈరోజు కీలక వ్యాఖ్యలు చేయటం జరిగింది.. దేశ భద్రతపై నిర్వహించిన డీజీపీ, ఐజీపీల సమావేశంలో మాట్లాడుతూ, తెలంగాణ అంశం ఆంధ్రప్రదేశ్‌కు మాత్రమే పరిమితమైంది కాదని దేశవ్యాప్తంగా కొత్త సవాళ్లను లేవనెత్తే అవకాశం ఉందని అభిప్రాయపడ్డారు.

 

ఇదే విషయాన్ని ముఖ్యమంత్రి కిరణ్ కుమార్ రెడ్డి కూడా పదేపదే హెచ్చరిస్తున్న విషయం తెల్సిందే. తెలంగాణ రాష్ట్ర ఏర్పాటు వల్ల నక్సలిజం పెరిగిపోతుందని అనేక సార్లు కేంద్రానికి సిఎం చెప్పటం జరిగింది. తెలంగాణ ఏర్పాటు నిర్ణయంతో భద్రతా సంస్థలకు కొత్త సవాళ్లు ఎదురయ్యే అవకాశం ఉందని పేర్కొన్నారు. అన్ని వ్యవస్థలు అప్రమత్తంగా మెలగాలని ఆయన సూచించారు. అసలే ఎక్కడ విభజన ప్రక్రియ ఆగిపోతుందోనని ఆందోళనలో ఉన్న తెలంగాణావాదులు కేంద్ర ఇంటెలిజెన్స్ బ్యూరో చీఫ్ చేసిన హెచ్చరికలు వారిని మరింత ఆందోళనకు గురిచేశాయి.

 

కాగా, సాధ్యమైనంత త్వరలో తెలంగాణ ప్రక్రియను పూర్తి చేస్తామని కేంద్ర హోంశాఖ మంత్రి సుశీల్‌కుమార్ షిండే వెల్లడించారు. రాష్ట్ర విభజనపై ఏర్పాటైన కేంద్ర మంత్రుల బృందం ఇవాళ నార్త్‌బ్లాక్‌లో సమావేశమై చర్చించిన అనంతరం ఆయన మాట్లాడారు. వచ్చే వారం మరోసారి జీవోఎం సమావేశమవుతుందని ఆయన పేర్కొన్నారు. జీవోఎం త్వరలో తుది నివేదికను ఖరారు చేస్తుందని స్పష్టం చేశారు. ఆర్థిక మంత్రి చిదంబరం విదేశాల్లో ఉన్నందున ఇవాళ్టి సమావేశానికి హాజరుకాలేకపోయారని తెలిపారు.