దావూద్ గురించి వెంగసర్కార్ సంచలన వ్యాఖ్యలు

Posted: 10/28/2013 09:18 PM IST

క్రికెట్ కి, క్రికెటర్లకు మాఫియాతో సంబంధాలు ఉన్నాయని, మాఫియాతో కలిసే ఫిక్సింగ్ లకు పాల్పడతారంటూ ఎప్పటి నుండో ఆరోపణలు ఉన్న విషయం తెలిసిందే. ఇటీవల ఐపీఎల్ లో ఫిక్సింగ్ ఉదంతం అప్పుడు బుకీలకు మాఫియాతో సంబంధాలు ఉన్నాయని, మాఫియా క్రికెటర్లకు ఎరవేస్తారని రుజువయ్యింది కూడా. నేడు భారత్ మాజీ క్రికెటర్ అయిన వెంగ్ సర్కార్ భారత్ జట్టు పై, ఆ జట్టుకు ఉన్న మాఫియా సంబంధాల పై సంచలన వ్యాఖ్యలు చేశాడు.

భారత క్రికెటర్లకు అండర్ వరల్డ్ డాన్ దావూద్ ఇబ్రహీం కి సబంధాలు ఉన్నాయనే సంచలన వ్యాఖ్యలు చేసి క్రికెట్ వర్గాల్లో పెద్ద దుమారాన్నే రేపాడు. 1986 ఆస్ట్రేలియా-ఆసియా‌కప్ ఫైనల్ మ్యాచ్‌కు ముందు పాకిస్థాన్‌తో జరిగే మ్యాచ్‌లో నెగ్గితే భారత ఆటగాళ్లకి టయోటా కారు ఇస్తానని దావూద్ ఆఫర్ ఇచ్చాడని, బాలీవుడ్ నటుడు మహమూద్ ఓ వ్యాపారిగా దావూద్‌ని డ్రెస్సింగ్ రూమ్‌లోవున్న ఆటగాళ్లకు పరిచయం చేశాడని, అప్పుడే డ్రెస్సింగ్ రూంలోకి వచ్చిన కెప్టెన్ కపిల్‌దేవ్ వెంటనే దావూద్‌ని బయటకు వెళ్లిపోవాలని ఈ సందర్భంగా కోరాడని, కపిల్‌పై ఆగ్రహం వ్యక్తంచేసిన దావూద్ తర్వాత రూంలో నుంచి బయటికి వెళ్లాడని , ఆ టైంలో నాకు తప్ప వేరేవారికి అతను దావూద్ అని తెలియదని ఓ ఛానల్ కి ఇచ్చిన ఇంటర్వ్యూలో వెల్లడించాడు. 

కపిల్ స్పందనతో ఆగ్రహం వ్యక్తం అంతేగాక తన కారు బహుమతిని కూడా దావూద్ రద్దు చేసుకున్నట్లు చెప్పాడు. ఆ సమయంలో కపిల్ దేవ్‌కి తను మాట్లాడిన వ్యక్తి దావూద్ అని తెలియదని సర్కార్ తెలిపారు. అయితే అతను రూంలోకి రావడాన్ని అనుమతించలేదని, అతని బహుమతిని కపిల్ నిరాకరించాడని అన్నారు.

కాగా ఆ ఫైనల్ మ్యాచులో ఒక వికెట్ తేడాతో పాకిస్థాన్ విజయం సాధించింది. దావూద్ ఇబ్రహీంకు అల్ఖైదాతో కూడా సంబంధాలున్నట్లు తెలియడంతో అతను ప్రపంచవ్యాప్తంగా మోస్ట్ వాంటెడ్ గా గుర్తించిన సంగతి తెలిసిందే. తాజాగా దావూద్ పై వెంగీ విమర్శలు గుప్పించడంతో క్రికెట్ వర్గాల్లో చర్చనీయాంశమైంది. దీని పై బీసీసీఐ ఏవిధంగా స్పందిస్తుందో, ఈ వ్యవహారం ఎంత దూరం వెళుతుందోనని క్రికెట్ వర్గాల్లో ఆందోళన మొదలైంది.