గుండెపోటుని సూచించే ఆప్

Posted: 09/04/2013 02:41 PM IST

సెల్ ఫోన్లు వచ్చిన తర్వాత మానవాళికి దూరాలు దగ్గరై అయినవాళ్ళతో సంభాషించటంలో సౌలభ్యం ఏర్పడింది.  స్మార్ట ఫోన్లు వచ్చిన తర్వాత ఫోన్లు మరో పెద్ద అంగ వేసి వినియోగదారులను మరింతగా మురిపిస్తున్నాయి.  అంతకు ముందున్నట్లుగా ఫోన్లలో ఫోన్ బుక్, గేమ్స్, అలారం, కేలండర్- అలాంటివే కాకుండా వివిధ అప్లికేషన్లు (ఆప్) వచ్చి వాటి సేవలను ఇంకా విస్తృతం చేసాయి. 

అందులో భాగమే మనిషికి మూడు సంవత్సరాలలో రాబోయే గుండె పోటుని పసిగట్టి హెచ్చరించటం.  నమ్మశక్యంగా లేదు కదూ.  ఎడింబర్గ్, మాసాచ్యుసెట్స్ మెడికల్ విద్యార్థులు మాత్రం సమిష్టిగా కృషిచేసి దాన్ని సంభవం చేసారు.

సాధారణంగా రెండవ సారి వచ్చే గుండెపోటు ప్రాణాంతకమౌతుందని సర్వేలో తేలింది కాబట్టి, ఒకసారి వచ్చిన వారికి రెండవసారి వస్తుందనే భయం వాళ్ళకీ, వాళ్ళ వాళ్ళకీ కూడా ఉంటుంది.  అందువలన ఎప్పటికప్పుడు వాళ్ళ గుండె స్థితిని తెలియజేసే యంత్రం ఉండటం ఎంతో అవసరం.  అంతేకాదు, డాక్టర్లకీ నర్సులకీ, పారామెడికల్ సిబ్బందికీ కూడా మూడు సంవత్సరాల వరకు పేషెంట్ స్థితిని అంచనా వేసి చెప్పటం జరగుతుంది కాబట్టి అది చికిత్సకు ఎంతో ఉపయోగకరమవుతుంది. 

ఈ ఆప్ ని కనిపెట్టిన మెడికల్ ప్రొఫెసర్లు, గుండెపోటు వచ్చిన వాళ్ళలో ప్రతి ఐదుగురిలో ఒకరు ఐదు సంవత్సరాల లోపులోనే మృతిచెందటం జరుగుతోందని, అందుకే వాళ్ళ స్థితిగతులను తెలుసుకోవటం చాలా అవసరమని అన్నారు. 

ఈ అప్లికేషన్ వాళ్ళ స్థితిని తెలియజేయటమే కాకుండా ప్రాథమికంగా తీసుకోవలసిన జాగ్రత్తలు, ఔషధాలను కూడా సూచిస్తుందట. 

-శ్రీజ