Posted: 03/15/2013 12:59 PM IST

భారత్ సార్వభౌమత్వం మీద నే సవాల్ చేసి పార్లమెంటు మీద దాడిచేసిన అఫ్జల్ గురు కి విధించిన శిక్షను ఖండిస్తూ పాకిస్తాన్ ప్రభుత్వం నిన్న పార్లమెంటులో అధికారికంగా రిజొల్యూషన్ ని పాస్ చేసింది.   అంతేకాదు అఫ్జల్ గురు కి విధించిన ఉరిశిక్ష వలన జమ్మూ కాశ్మీర్ లో చెలరేగుతున్న సంక్షోభంలో కాశ్మీరు ప్రజలు ఒంటరి పోరాటం చెయ్యనక్కరలేదు.  వారికి మేము తోడున్నాం అంటూ అదే రిజొల్యూషన్ లో భరోసా ఇచ్చింది.  

పై రిజొల్యూషన్ ని పాకిస్తాన్ నేషనల్ అసెంబ్లీలో కాశ్మీర్ అంశం మీద ప్రత్యేక పానెల్ కి, జమియాత్  ఉలేమా ఏ ఇస్లామ్ ప్రధాన మౌలానా అయిన ఫజ్లుర్ రహమాన్ ప్రతిపాదించగా ప్రభుత్వం ఆమోదించింది.

దీనిమీద స్పందిస్తూ, పాకిస్తాన్ ఎంత రెచ్చగొట్టినా చేతకాని వాళ్ళల్లా ఇంకా వాళ్ళతో పొత్తు పెట్టుకుంటూ సంబంధాలను కొనసాగిస్తూ వుండటమేమిటని భారతీయ జనతా పార్టీ నేత అరుణ్ జైట్లీ ఈ రోజు రాజ్యసభలో కేంద్ర ప్రభుత్వాన్ని నిలదీసారు.  పాకిస్తాన్ ప్రభుత్వం హద్దులు మీరి ప్రవర్తిస్తోంది.  పాక్ పార్లమెంటులో చేసిన రిజొల్యూషన్ తో వాళ్ళ కపట బుద్ధి తేటతెల్లమౌతోంది అని కూడా జైట్లీ అన్నారు.  

అంతర్జాతీయంగా తేల్చుకోవలసిన సమస్యలమీద పాకిస్తాన్ వేలు పెట్టటం సబబు కాదని భారత ప్రభుత్వం పాకిస్తాన్ కి తీవ్ర స్థాయిలో హెచ్చరికలు పంపించింది.

-శ్రీజ