Posted: 01/04/2013 05:49 PM IST

తమిళనాడు మాజీ ముఖ్యమంత్రి డీఎంకే పార్టీ అధినేత కరుణానిధి ఇంటిలో  రాజకీయ  వారసత్వ పోరు నడుస్తుంది.  తన చిన్న కుమారుడు స్టాలిన్  తన రాజకీయ  వారసుడని  కరుణానిధి చేసిన  ప్రకటన ఆయన పెద్ద కుమారుడు, కేంద్రమంత్రి  అళగిరికి ఆగ్రహం తెప్పించింది.  ఆయన  రాజకీయ పార్టీకి  వారసుడిని ప్రకటించడానికి  డీఎంకే పార్టీ  మఠం కాదని,  అదీ రాజకీయ పార్టీ అని  ఆయన ఆవేశంగా  అన్నారు.  తమిళనాడు రాజకీయాల్లో మరోసారి వారసత్వ పోరు తెరమీదకు వచ్చింది. డీఎంకే అధ్యక్షుడు కరుణానిధి తన రాజకీయ వారసుణ్ని ప్రకటించడంతో వారసత్వ పోరుకు మళ్లీ ఆజ్యం పోసినట్టయింది. పార్టీలో కరుణ వారసత్వం కోసం ఆయన తనయులు అళగిరి, స్టాలిన్‌ల మధ్య కొంతకాలంగా పెద్ద సమరం జరుగుతున్న విషయం తెలిసిందే. స్టాలిన్‌కు పగ్గాలు ఇవ్వాలంటూ పార్టీలోని పలువురు సీనియర్లు సూచిస్తున్నా కరుణ మాత్రం ఈ విషయంలో మౌనంగా ఉంటూనే వచ్చారు. అయితే వారసుడిపై ఆయన తన మనసులోని మాటను బయటకు వెల్లడించటంతో డీఎంకే అధ్యక్ష పగ్గాలు త్వరలో స్టాలిన్ చేతికి చిక్కే అవకాశాలు కన్పిస్తున్నాయి.  కరుణానిధి చేసిన పరోక్ష వ్యాఖ్యలు ఇందుకు అద్దం పడుతున్నాయి. ‘నా ఊపిరి ఉన్నంత కాలం దళిత సామాజిక వర్గం అభ్యున్నతికి కృషి చేస్తా... నా తర్వాత స్టాలిన్ చూసుకుంటాడు.. స్టాలిన్‌ను మరచిపోకండి’ అంటూ తన వారసుడిని కరుణానిధి ప్రకటించారు.

డీఎంకేలో వారసత్వ సమరం గురించి తెలిసిందే. పార్టీ పగ్గాల్ని చేజిక్కించుకునేందుకు తనయులు అళగిరి, స్టాలిన్ మధ్య పెద్ద సమరమే జరుగుతోంది. వారసత్వ సమస్య కుటుంబంలో ఎక్కడ చిచ్చు రేపుతుందోనన్న బెంగ ఆయన్ను వెంటాడుతూ వస్తోంది. దీంతో వయోభారంతో ఉన్నప్పటికీ పార్టీని కాపాడుకునేందుకు కరుణానిధి అధ్యక్ష పదవిని అంటి పెట్టుకుని ఉన్నారు. తన తర్వాత ఆ స్థానాన్ని భర్తీ చేసేది స్టాలినేనని కరుణనిధి వ్యాఖ్యలతో ఆయన పెద్ద కుమారుడు అళగిరి వర్గానికి షాక్ ఇచ్చినట్లు అయ్యింది. కరుణానిధి మొదటి భార్య దయాళు అమ్మాళ్‌ సంతానమే స్టాలిన్. ఆయన కరుణకు మూడో కొడుకు. డీఎంకే వ్యవస్థాపకుడికి మొత్తం నలుగురు కొడుకులు, ఇద్దరు కూతుళ్లు. స్టాలిన్‌ చెన్నై మేయర్‌గా, తమిళనాడు డిప్యూటీ సీఎంగానే కాక పార్టీ పదవుల్లో అనేక స్థాయిల్లో పని చేశారు. రాజకీయ వ్యవహారాల్లో కరుణకు కుడిభుజంగా ఉంటున్నారు.  మరోవైపు తమ్ముడు స్టాలిన్‌కు ప్రాధాన్యం ఇవ్వడంపై మండిపడుతూ ప్రత్యేక వర్గాన్ని కూడగట్టుకున్న అళగిరి, ఇప్పుడు అధికారంపోయాక తన తడాఖా చూపుతున్నారు. స్టాలిన్ చేష్టలపై అళగిరి బహిరంగంగానే మండిపడుతుండగా, పార్టీ నిర్ణయమంటూ అళగిరి వర్గీయులను పార్టీ నుంచి బయటకు పంపిస్తున్నాడు స్టాలిన్.  ఇప్పటికే కనిమొళి వ్యవహారంలో ఇద్దరు కొడుకులకు సర్ది చెప్పేందుకు అధికారం పోగొట్టుకున్న వృద్ధనేతకు ఇప్పుడు వీరి ప్రవర్తన నలుగురిలో నవ్వులపాలు చేస్తుందేమోనన్న బెంగ పట్టుకుంది. ఈ నేపథ్యంలో కరుణ చేసిన ప్రకటనపై అళగిరివర్గం ఆగ్రహం వ్యక్తం చేస్తోంది. ఈ పరిణామాలన్నింటికీ పరిష్కారం లభించేనా? స్టాలిన్ చేతికి బాధ్యతలు వచ్చేనా? అనేదానిపై కరుణానిధి ఈ ఆరోతేదీన స్పష్టమైన నిర్ణయం వెలువరుస్తాననడం కొసమెరుపు.