Posted: 01/05/2013 09:56 AM IST

తెలంగాణ పై తేల్చేసేందుకు కాంగ్రెస్ అధిష్టానం పావులు కదుపుతున్నట్లే కనిపిస్తుంది. మొన్న అఖిలపక్ష భేటీలో తెలంగాణ అంశం పై నెలరోజుల్లో తేల్చాస్తామని చెప్పిన హోంమంత్రి షిండే వ్యాఖ్యలకు అనుగుణంగానే అధిష్టానం దీని పై చర్చించడానికి గురువారం రోజు కోర్ కమిటీ మీటింగ్ పెట్టి చర్చించిన విషయం తెలిసిందే. ఈ సమీక్షకు కోర్‌ కమిటీ సభ్యులు, సీనియర్‌ నేతలు ఆర్థిక మంత్రి చిదంబరం, రక్షణ శాఖ మంత్రి ఎ.కె. ఆంటోని. హోం మంత్రి సుశీల్‌కుమార్‌ షిండే, సోనియా రాజకీయ కార్యదర్శి, అహ్మద్‌ పటేల్‌, కాంగ్రెస్‌ ఎన్నికల ప్రచార కమిటీ కన్వీనర్‌ దిగ్విజయ్ సింగ్‌, రాష్ట్ర కాంగ్రెస్‌ వ్యవహారాల ఇన్‌చార్జీ, కేంద్ర మంత్రి గులాంనబీ ఆజాద్‌, రాష్ట్ర కాంగ్రెస్‌ వ్యవహారాల పరిశీలకుడు, కేంద్ర మంత్రి వాయలార్‌ రవి తదితరులు హాజరయ్యారు. ఈ భేటీలో తెలంగాణపై అఖిలపక్షం విషయాలను, దేశంలోని ఇతర కీలక అంశాలను అధినేత్రి క్షుణ్ణంగా పరిశీలించారు.

ఇక నిన్న సాయంత్రం పలు కీలక విషయాలను ప్రధానికి వివరించడానికి ఆయన నివాసంలో మళ్లీ భేటీ అయ్యారు. ఈ సమావేశానికి కేంద్రమంత్రి పవన్ కుమార్ బన్సాల్ కూడా హాజరయ్యారు.  ఈ సమావేశంలో ముఖ్యంగా మూడు అంశాల గురించి ప్రస్తానకు వచ్చినట్లు సమాచారం. తెలంగాణ ప్రాంతానికి ప్రత్యేక ప్యాకేజ్ లేదా హైదారాబాద్ ని ఉమ్మడి రాజధాని చేసి అటో తేల్చేయాలనే అభిప్రాయానికి వచ్చినట్లు సమాచారం. ఈ విషయం పై తెలంగాణ కాంగ్రెస్ నేతలను పిలిచి మాట్లాడే అవకాశం కూడా ఉన్నట్లు తెలుస్తుంది. ఇటు సీమాంధ్ర ప్రాంత నేతలను కూడా పిలిపి మాట్లాడి ఓ నిర్ణయం త్వరలోనే వెలువరించే అకాశం ఉందని అంటున్నాయి రాజకీయ వర్గాలు. ఇక తెలంగాణ ముఖ్య నేత అయిన జానారెడ్డిని, కిరణ్ ని అందుబాటులో ఉండాలనే సంకేతాలు పంపించినట్లు తెలుస్తుంది. మొత్తానికి తెలంగాణ పై కాంగ్రెస్ ముందుకు అడుగులు వేస్తుందనే చెప్పవచ్చు.