Posted: 02/14/2012 10:46 AM IST

ఆదాయానికి మించి ఆస్తులు కలిగి ఉన్నట్లు ఆరోపణలెదుర్కొంటున్న సుప్రీం కోర్టు మాజీ ప్రధాన న్యాయమూర్తి, జాతీయ మానవ హక్కుల కమిషన్‌ ఛైర్మన్‌ కెజి బాలకృష్ణన్‌పై విచారణ జరిపారా? లేదా?, ఈ ఆరోపణలపై ఎలాంటి చర్యలు తీసుకోబోతున్నారు? అని సర్వోన్నత న్యాయస్థానం కేంద్ర ప్రభుత్వాన్ని ప్రశ్నించింది. దీనిపై నెల రోజుల్లోగా స్పందన తెలియజేయాలని ఆదేశించింది.

2004-2009 మధ్య కాలంలో కెజి బాలకృష్ణన్‌ తన బంధువుల పేర్లతో రూ. 40 కోట్ల ఆస్తులు కూడబెట్టారని, ఆయనపై విచారణకు ప్రభుత్వాన్ని ఆదేశిస్తూ ఆదేశాలు జారీ చేయాలంటూ కామన్‌ కాజ్‌ అనే స్వచ్ఛంద సంస్థ దాఖలు చేసిన పిటిషన్‌ను కోర్టు విచారించింది. ఈ విషయమై సదరు సంస్థ పది నెలల క్రితమే ప్రభుత్వానికి విజ్ఞప్తి చేసినా నేటికీ చర్యలు తీసుకోకపోవడంపై స్పందించిన ప్రధాన న్యాయమూర్తి ఎస్‌హెచ్‌ కపాడియా నేతృత్వంలోని ధర్మాసనం నెల రోజుల్లోగా స్పందన తెలపాలని అటార్నీ జనరల్‌ జిఇ వాహనవతిని ఆదేశించింది. ఈ పిటిషన్‌పై అన్ని సంబంధిత ప్రభుత్వ అథారిటీలకు లేఖలు రాస్తానని వాహనవతి ఈ సందర్భంగా కోర్టుకు తెలిపారు.

బాలకృష్ణన్‌ తీవ్రమైన అనుచిత ప్రవర్తనకు పాల్పడినట్లు చాలా ఆధారాలున్నా, మానవ హక్కుల కమిషన్‌ ఛైర్మన్‌ పదవి నుంచి ఆయన్ని తొలగించడానికి ప్రభుత్వం ఎలాంటి చర్యలూ తీసుకోలేదని పిటిషనర్‌ ఆరోపించారు. బాలకృష్ణన్‌ బినామీ ఆస్తులు కూడబెట్టినట్లు ఆరోపణలకు సంబంధించి పత్రికల్లో వచ్చిన వార్తలను కూడా పిటిషనర్‌ కోర్టుకు సమర్పించారు. మానవ హక్కుల చట్టం కింద జాతీయ మానవ హక్కుల కమిషన్‌ ఛైర్మన్‌ లేదా సభ్యులను తొలగించాలంటే, ఈ అంశాన్ని సుప్రీం కోర్టుకు రాష్ట్రపతి రిఫర్‌ చేస్తారు. దీనిపై సుప్రీం కోర్టు చేసే ప్రతిపాదనను బట్టి రాష్ట్రపతి నిర్ణయం తీసుకుంటారు.