హిమాచల్ ప్రదేశ్ లో వరుణ బీభత్సం.. కొండచరియలు విరిగిపడ్డి పలువురు గల్లంతు..

Posted: 07/06/2022 01:32 PM IST

హిమాచ‌ల్ ప్ర‌దేశ్‌లో కుంభ‌వృష్టి కురిసింది. కులు జిల్లాలోని ప‌ర్వ‌తి లోయ‌లో ఉన్న చోజ్ ముల్లా వ‌ద్ద అక‌స్మాత్తుగా క్లౌడ్‌బ‌స్ట్ అయ్యింది. ఈ ఘ‌ట‌న వ‌ల్ల స్థానిక గ్రామాల్లో భారీ న‌ష్టం సంభ‌వించింది. చోజ్ గ్రామంలో క్లౌడ్‌బ‌స్ట్ కావ‌డం వ‌ల్ల న‌లుగురు గ‌ల్లంతు అయిన‌ట్లు కులు ఎస్పీ గురుదేవ్ చాంద్ శ‌ర్మ తెలిపారు. పార్వ‌తి న‌దిలో అక‌స్మాత్తుగా వ‌ర‌ద పెర‌గ‌డంతో స‌మీపంలో ఉన్న క్యాంపు సైట్ల‌న్నీ ఆ ధాటికి కొట్టుకుపోయిన‌ట్లు తెలుస్తోంది. ఆ వ‌ర‌ద ప్ర‌భావం వ‌ల్ల కొంద‌రు టూరిస్టులు కొట్టుకుపోయి ఉంటార‌ని స్థానికులు భావిస్తున్నారు. చోజ్ గ్రామంతో లింకు ఉన్న బ్రిడ్జ్ ధ్వంసం అయ్యింది. న‌ది స‌మీపంలో ఉన్న ఆరు కేఫ్‌లు కూడా వ‌ర‌ద నీటిలో కొట్టుకుపోయాయి.

షిమ్లాలో కొండ‌చ‌రియ‌లు విరిగిప‌డ్డాయి. ఓ భారీ రాయి వ‌చ్చి కారు మీద ప‌డ‌డంతో.. ఓ మ‌హిళ మృతిచెందింది. ఇద్ద‌రు గాయ‌ప‌డ్డారు. ద‌ల్లీ ట‌న్నెల్ వ‌ద్ద ఈ ఘ‌ట‌న జ‌రిగింది. మంగ‌ళ‌వారం రాత్రి నుంచి షిమ్లాలో ఎడ‌తెర‌పిలేకుండా వ‌ర్షాలు కురుస్తూనే ఉన్నాయి. ఫిరోజ్‌పూర్‌-షిప్కీ జాతీయ ర‌హ‌దారిని మూసివేశారు. బ్రోనీ నుల్లాలో నీటి ప్ర‌వాహం పెర‌గ‌డంతో హైవేను బ్లాక్ చేశారు. కులు జిల్లాలోని మ‌ల‌నా ప్రాజెక్టు వ‌ద్ద అక‌స్మిక వ‌ర‌ద‌లు సంభ‌వించాయి. ఓ బిల్డింగ్‌లో చిక్కుకున్న 30 మంది ఉద్యోగుల‌ను సుర‌క్షితంగా త‌ర‌లించారు. ఫ్లాష్ ఫ్ల‌డ్స్‌లో వాహ‌నాలు ధ్వంసం అయ్యాయి.

ముంబైని ముంచెత్తిన వర్షం

ముంబైలో ఇవాళ కూడా వ‌ర్షాలు ముంచెత్తడంతో జ‌న‌జీవనం స్తంభించిపోయింది. శివారు ప్రాంతాలన్నీ జ‌ల‌మ‌యమయ్యాయి. దీంతో ట్రాఫిక్ ఇబ్బందులు కూడా ఏర్ప‌డుతున్నాయి. శుక్ర‌వారం వ‌ర‌కు ముంబైతో పాటు శివారు ప్రాంతాల్లో భారీ వ‌ర్షం కురిసే అవ‌కాశాలు ఉన్న‌ట్లు వాతావ‌ర‌ణ‌శాఖ హెచ్చ‌రించిన విష‌యం తెలిసిందే. న‌గ‌రంలోని కొన్ని రూట్ల‌లో రైలు, బ‌స్సు స‌ర్వీసుల‌పై ప్ర‌భావం ప‌డింది. లోత‌ట్టు ప్రాంతాలు, రైల్వే ట్రాక్‌లు మునిగిపోవ‌డంతో ట్రాఫిక్ నిలిచిపోతోంది. సోమ‌వారం నుంచి ముంబైలో వ‌ర్షాలు కురుస్తూనే ఉన్నాయి. కొన్ని న‌దుల్లో నీటి స్థాయి పెరుగుతూనే ఉంది. రాయిగ‌డ్‌, ర‌త్న‌గిరి జిల్లాల‌కు రెడ్‌, ఆరెంజ్ హెచ్చ‌రిక‌ల‌ను జారీ చేశారు. త‌గిన చ‌ర్య‌లు తీసుకోవాల‌ని సీఎం ఏక్‌నాథ్ షిండే ప్ర‌భుత్వ అధికారుల‌కు ఆదేశాలు జారీ చేశారు.