ఉదయ్ పూర్ హత్య వెనుక ఉగ్రకోణం.. నిందితులకు పాక్​ ఉగ్రసంస్థతో 'లింక్స్​.!

Posted: 06/29/2022 02:43 PM IST

రాజస్థాన్​ ఉదయ్​పూర్​లో హిందూ టైలర్​ హత్య దేశవ్యాప్తంగా సంచలనంగా మారింది. బీజేపి మాజీ అధికార ప్రతినిధి నుపూర్ శర్మకు మద్దతుగా సామాజిక మాద్యమాల్లో కన్నయ్య లాల్​ అనే దర్జీని పెట్టిన పోస్టును ఖండిస్తూ.. ఆయన దుకాణంలోకి చోరబడిని ఇద్దరు ముష్కరులు ఆయనను అత్యంత దారుణంగా హత్యచేసిన విషయం తెలిసిందే. అయితే దర్జీ కన్నయ్య లాల్ మొండం నుంచి తలను వేరు చేసేంత దారుణానికి వారు ఒడిగట్టారు. ఈ విషయం తెలిసిన నేపథ్యంలో ఇది దేశ, అంతర్జాతీయ ఉగ్ర సంస్థల ప్రమేయం ఉన్నట్లు ఆ రాష్ట్ర ముఖ్యమంత్రి ఆశోక్ గెహ్లాట్ అనుమానాలు వ్యక్తం చేశారు.

దీంతో ఉగ్రకోణంలో ఈ హత్యకేసును నమోదు చేసిన పోలీసులు.. దర్యాప్తు ప్రారంభించారు. కాగా, తమను తాము ఇస్లామిక్ రాడికల్ గ్రూపుకు చెందిన వ్యక్తులుగా ప్రకటించుకున్న ఇద్దరు ఉగ్రవాదులకు పాకిస్థాన్​ ఉగ్రసంస్థలతో సంబంధం ఉన్నట్టు తెలుస్తోంది. నిందితులు గౌస్​ మహమ్మద్​, రియాజ్​ అహ్మెద్​లు.. కరాచీ ఆధారిత సున్ని ఇస్లామిస్ట్​ సంస్థ దావత్​ ఈ ఇస్లామికు పరిచయస్తులని సమాచారం. దావత్​ ఈ ఇస్లామికి పాకిస్థాన్​లోని ఉగ్రవాద సంస్థ తెహ్రీక్​ ఈ లబ్బైక్​తో సంబంధం ఉందని.. ఉదయ్​పూర్​ హత్య ఘటన దర్యాప్తులో ఉన్న కొందరు చెబుతున్నారు.

మహమ్మద్​ ప్రవక్తపై బీజేపీ మాజీ నేత నుపుర్​ శర్మ చేసిన వివాదాస్పద వ్యాఖ్యలు ప్రపంచవ్యాప్తంగా అలజడులు సృష్టించాయి. నుపుర్​ వ్యాఖ్యలను ముస్లిం దేశాలు తీవ్రంగా ఖండించాయి. దేశంలోనూ నిరసనలు చెలరేగాయి.ఈ క్రమంలోనే నుపుర్​ శర్మకు మద్దతుగా.. ఉదయ్​పూర్​లోని టైలర్​ కన్నయ్య లాల్​.. సామాజిక మాధ్యమాల్లో ఓ పోస్ట్​ చేసినట్టు తెలుస్తోంది. దీనిపై ఆగ్రహాం వ్యక్తం చేస్తూ.. మంగళవారం అతడి దుకాణంపై దాడి చేశారు రియాజ్​, గౌస్​. కత్తులతో అతడిని చంపేశారు. ఆ వీడియోను సామాజిక మాధ్యమాల్లో పోస్ట్​ చేశారు.

ప్రధానమంత్రి నరేంద్ర మోదీ, బీజేపి మాజీ అధికార ప్రతినిధి నుపూర్ శర్మను కూడా చంపేస్తామని హెచ్చరికలు జారీ చేశారు. కొన్ని నిమిషాల్లోనే ఈ వార్త సామాజిక మాధ్యమాల్లో వైరల్​గా మారింది. ఉదయ్​పూర్​లో మతఘర్షణలు చెలరేగాయి. నిందితులను అదుపులోకి తీసుకున్న పోలీసులు.. ఉదయ్​పూర్​లో కఠిన ఆంక్షలు విధించారు. ఇంటర్నెట్​ సేవలను రద్దు చేశారు. ఉగ్రవాద వ్యతిరేక చట్టాల కింద నిందితులపై కేసు నమోదు చేశారు పోలీసులు.