ఆంధ్రప్రదేశ్ లో 180కి చేరిన కరోనా కేసులు.. తొలి మరణం నమోదు

Posted: 04/04/2020 10:13 AM IST

Ap reports 16 new covid 19 cases tally rises to 180

ఆంధ్రప్రదేశ్ రాష్ట్రంలో కరోనా పాజిటివ్ కేసుల సంఖ్య రోజు రోజుకి వేగంగా పెరుగుతున్నాయి. రాష్ట్ర వ్యాప్తంగా పాజిటివ్ కేసుల సంఖ్య అంతకంతకూ పెరుగుతోంది. రాత్రి 10.30 గంటల నుంచి ఇవాళ ఉదయం 10గంటల వరకు కొత్తగా 16 కరోనా కేసులు నమోదయ్యాయి. దీంతో రాష్ట్రంలో కరోనా పాజిటివ్‌ కేసుల సంఖ్య 180కి చేరింది. నిన్న తూర్పు గోదావరి జిల్లాలో రెండు, విశాఖపట్టణంలో ఒక కేసు నమోదయ్యాయి. వీటితో కలుపుకుని మొత్తం కేసుల సంఖ్య 164గా నమోదు కాగా, కొత్తగా పెరిగిన 16 కేసులతో ఆ సంఖ్య 180కు చేరింది.

గుంటూరు జిల్లాలో 3, కడప జిల్లాలో 4, కృష్ణా జిల్లాలో 4, కర్నూలు జిల్లాలో 3, చిత్తూరు, ప్రకాశం జిల్లాలో ఒక్కో కేసు ఇవాళ ఉదయం నమోదయ్యాయి. అయితే కొత్తగా నమోదైన కేసుల్లో ఎక్కువ మంది ఢిల్లీలోని జమాత్‌ వెళ్లినవారేనని అధికారులు గుర్తించారు. కర్నూలు జిల్లాలో కొత్తగా 3 కరోనా పాజిటివ్‌ కేసులు నమోదైయ్యాయి. కర్నూలు నగరంలోని రోజా వీధి, అవుకు, బనగానపల్లెలో ఒక్కొ కేసు నమోదైనట్లు వెల్లడించారు. వీరంతా ఢిల్లీలోని మర్కజ్‌లో జరిగిన మత ప్రార్థనలకు హాజరైన వారేని వెల్లడించారు. కాగా, కర్నూలు జిల్లా నుంచి 449 మంది ఢిల్లీ జమాత్‌కు వెళ్లాగా.. మరో 350 మంది రిపోర్టులు రావాల్సి ఉంది.

ఇక, కోలుకున్న వారిలో యుకే నుంచి వచ్చిన ఒంగోలుకు చెందిన 23 ఏళ్ల యువకుడు ఉన్నట్టు అధికారులు తెలిపారు. అలాగే తూర్పు గోదావరి జిల్లాకు చెందిన 22 ఏళ్ల యువకుడిని కూడా డిశ్చార్జ్ చేసినట్టు పేర్కొన్నారు. అతడు కూడా యూకే నుంచి వచ్చాడని, కోవిడ్ లక్షణాలతో గత నెల 20న కాకినాడ ఆసుపత్రిలో చేరినట్టు తెలిపారు. అతడికి కూడా మూడుసార్లు పరీక్షలు నిర్వహించగా నెగటివ్ రిపోర్టులు రావడంతో నిన్న డిశ్చార్జ్ చేసినట్టు వివరించారు. వీరిద్దరితో కలిపి మొత్తం నలుగురు వ్యక్తులు ఆసుపత్రి నుంచి డిశ్చార్జ్ అయినట్టు తెలిపారు.