సీఏఏ అల్లర్లు: ముస్లిం పెద్దలకు రజనీ హామి.. శాంతి నెలకొల్పుదాం..

Posted: 03/02/2020 12:35 PM IST

ఢిల్లీలోని ఈశాన్య ప్రాంతంలో రేగిన అల్లర్లతో యావత్ దేశంలో పలువురు దేశ ప్రజలను భయాందోళనలోకి నెట్టింది. అల్లర్ల మాటును అందోళనకారులు చేసిన ఆకృత్యాలను. ఘోరాలను కూడా బాధితులు వెలిబుచ్చుతున్నారు. ఆందోళనకారులు నిండు గర్భిణి కడుపుపై తన్నగా.. మిరాకిల్ బేబి జన్మించడం, ఓ తల్లి తన నలుగురు ఆడపిల్లలతో మోదటి అంతస్థు నుంచి దూకి స్థానికంగా తెలిసిన వారింటికి వెళ్లి తలదాచుకోవడం.. లాంటి ఘటనపై అనేకం మీడియా వెలుగులోకి తీసుకువచ్చింది.

అయితే ఈ ఘటనలను చదవడం.. మృతుల కటుంబాల ఆర్థనాధలు వినడం.. వారి ఆక్రంధనలను మీడియాలో చూసి.. చలించిపోయిన దక్షిణాధి సూపర్ స్టార్ రజనీకాంత్.. కేంద్రప్రభుత్వంపై తీవ్ర ఆగ్రహం వ్యక్తం చేశారు. అల్లర్లను అదుపు చేయలేకపోయిన వారు తమ పదవులకు వెంటనే రాజీనామా చేయాలని డిమాండ్ చేశారు. దేశరాజధానిలో నిఘావర్గాలు ఏం చేస్తున్నాయని ప్రశ్నించిన ఆయన.. అక్కడ శాంతిభద్రతల పర్యవేక్షణ చేస్తున్న కేంద్ర ప్రభుత్వమే ఈ ఘటనలకు పూర్తి బాధ్యత వహించాలని డిమాండ్ చేశారు.

దేశంలో శాంతి స్థాపన కోసం ఏం చేయడానికైనా సిద్ధంగా ఉన్నట్టు తెలిపారు. పలువురు ముస్లిం మతపెద్దలు రజనీతో భేటీ అయ్యారు. అనంతరం ఈ విషయాన్ని ట్విట్టర్ ద్వారా వెల్లడించిన సూపర్ స్టార్.. దేశంలో ప్రేమ, సమైక్యత, శాంతి, సామరస్య స్థాపనకు తనవంతు పాత్ర పోషించేందుకు సిద్ధంగా ఉన్నట్టు చెప్పారు. దేశంలో ప్రేమ, సమైక్యత, శాంతిని నెలకొల్పడమే ప్రజల తొలి ప్రాధాన్యంగా ఉండాలన్న ముస్లిం సోదరుల అభిప్రాయంతో తాను ఏకీభవిస్తున్నట్టు రజనీ చెప్పారు.