ITEMVIDEOS: వైసీపీ ఎమ్మెల్యే సునీల్ బెదిరింపు వీడియో..

Posted: 03/16/2019 09:36 PM IST

పూతలపట్టు వైసీపీ ఎమ్మెల్యే సునీల్ కు చేదు అనుభవం ఎదురైంది. ఎన్నికల షెడ్యూల్డు విడుదల కావడంతోనే హైదరాబాద్ లోని లోటస్ పాండ్ లో గల తమ పార్టీ అధినేత వైఎస్ జగన్ నివాసాసికి వచ్చినా.. తనను కలిసేందుకు జగన్ అపాయింట్ మెంట్ లభించకపోవడంతో.. ఆయన మూడు రోజులుగా ఎదరుచూపులు చూశాడు. మూడు రోజులు పడిగాపులు కాసినా ఆయనకు అధినేత జగన్ నుంచి పిలుపు రాకపోవడంతో.. విషయం మీడియాకు తెలిసింది. దీంతో సునీల్... లోటస్ పాండ్ నుంచి నిరాశగా వెనుదిరిగారు.

ఇలా వెళ్లిన సునీల్ తాజాగా ఓ బెదిరింపు వీడియో కాల్ ను తమ పార్టీ అధినేతకు పంపాడు. తనకు పూతలపట్టు అసెంబ్లీ టికెట్ అవసరం లేదని.. అయితే తనపై కొందరు వేస్తున్న నిందలు భరించలేక తాను జీవితాన్ని చాలించుకుందామని భావిస్తున్నానని.. తానే ఏ లోకంలో వున్నా తనను గుర్తుతెచ్చుకుంటే చాలునని అన్నారు. తనను అదరించి.. డాక్డరని గౌరవించి ఒకసారి పూతలపట్టు నియోజకవర్గం ప్రజలకు సేవ చేసి అవకాశం ఇచ్చారన్నారు.

తనకు రాజకీయాలతో అవసరం లేదని.. తాను సంపాదించుకుని బతకగలనని కూడా అన్నారు. తనకు ఇద్దరు పిల్లలని, వారికి తాను వృత్తిరిత్యా జీవితాలను ఇవ్వగలనని చెప్పారు. ఇక టీడీపీ వాళ్లకు కూడా తన గురించి తెలుసునని.. ఎన్ని రకాలుగా ప్రలోభపెట్టినా తాను వారి పక్షానికి వెళ్లలేదని అన్నారు. అయితే కొంతమంది మాత్రం తనపై కక్షగట్టి అసత్యప్రచారాలు చేయడం తనను బాధిస్తుందని అన్నారు. ఈ నిందను బాపుకునేందుకే తాను ఆత్మహత్య చేసుకుంటానని వీడియోలో పేర్కోన్నాడు.

కాగా, ఇటీవల ఆయన మీడియాతో మాట్లాడుతూ.. చిత్తూరు జిల్లాకు చెందిన సీనియర్ ఎమ్మెల్యే పెద్దిరెడ్డి రామచంద్రారెడ్డి తనను చూసినా... పట్టించుకోకపోవడంపై ఎమ్మెల్యే సునీల్ అసంతృప్తి వ్యక్తం చేశారు. గత ఎన్నికల్లో స్వల్ప మెజార్టీతో విజయం సాధించిన సునీల్ కు ఈ సారి టికెట్ దక్కడం అనుమానమే అనే ప్రచారం జరుగుతున్న నేపథ్యంలో... ఆయనకు వైసీపీ అధినేత అపాయింట్‌మెంట్ ఇవ్వకపోవడంపై చర్చ మొదలైన నేపథ్యంలో తాజాగా ఆయన ఈ బెదిరింపు వీడియోను విడుదల చేయడం కూడా చర్చనీయాంశంగా మారింది.