ITEMVIDEOS: పవన్ సీఎం కామెంట్లు.. జగన్ కు సెటైర్లు

Posted: 12/07/2017 03:01 PM IST

జనసేన చీఫ్ పవన్ కళ్యాణ్ పూర్తి స్థాయి రాజకీయ ఎంట్రీలో ఏ పక్షాలను విడిచిపెట్టడం లేదు. నిన్న వైజాగ్ సభలో అధికార పక్ష నేతలను టార్గెట్ చేస్తూ వ్యాఖ్యలు చేసిన ఆయన.. నేడు ప్రతిపక్ష నేత వైఎస్ జగన్ పై పరోక్షంగా విమర్శలు గుప్పించారు. తాను సీఎం అయ్యాక సమస్యలన్నీ పరిష్కరిస్తానంటూ ప్రజాసంకల్పయాత్రలో హామీలు గుప్పించుకుంటూ వెళ్తున్న విషయం తెలిసిందే. ఈ అంశాన్ని పరోక్షంగా లేవనెత్తిన పవన్ జగన్ కు చురకలు అంటించారు.

రాజ‌కీయం అంటే కేవలం సీఎం కావ‌డం మాత్రమే కాదని, సామాజిక మార్పు చేయ‌డ‌మేనని పవన్ అన్నారు. 'సీఎం అవుతాను.. అప్ప‌టివ‌ర‌కు ఆగండి ప‌నులు చేస్తానంటే కుద‌ర‌ద'ని.. ప్ర‌తిప‌క్షంలో ఉన్నా ప్ర‌భుత్వంతో ఎన్నో ప‌నులు చేయించ‌వ‌చ్చని హిత‌వు ప‌లికారు. తాను కేవలం ప్రభుత్వ అనుకూల వాదినన్న విమర్శలను తిప్పికొట్టిన ఆయన కులం ఆపాదించి ఇకపై ఎవరైనా కామెంట్లు చేస్తే బాగోదని గట్టిగా హెచ్చరించారు. కాగా, ప‌ర‌కాల ప్ర‌భాక‌ర్ లాంటి కమిట్‌మెంట్ లేని వ్య‌క్తులు జ‌న‌సేన‌లో ఉండ‌కూడ‌దని ప‌వ‌న్ క‌ల్యాణ్‌ అన్నారు.

సైద్ధాంతిక బ‌లంతో తాను జ‌న‌సేన పార్టీ పెట్టాన‌ని, గ‌తంలో బాగా ఆలోచించే బీజేపీ, టీడీపీకి మ‌ద్ద‌తు తెలిపాన‌ని అన్నారు. త‌న వ‌ద్ద‌కు వ‌చ్చి వంద‌ల కోట్లు ఇచ్చేవారు లేర‌ని, ఒక వేళ ఇచ్చినా తాను అటువంటి వారిని పార్టీలోకి తీసుకోన‌ని చెప్పారు. ఆంధ్ర‌ప్ర‌దేశ్‌లో అధికార‌, ప్ర‌తిప‌క్షాలు ఒక‌రికొర‌రు అవినీతిపై పుస్త‌కాలు వేసుకున్నార‌ని అన్నారు. రాష్ట్ర ప‌రిస్థితులు ఇలా ఉంటే పెట్టుబ‌డులు ఎలా పెడ‌తామ‌ని త‌న‌ను లండ‌న్‌లో కొంద‌రు అడిగార‌ని చెప్పారు. డ‌బ్బు లేక‌పోయినా రాజ‌కీయాలు చేయ‌వ‌చ్చ‌ని తాను నిరూపిస్తాన‌ని పవన్ పేర్కొన్నారు.