కుక్కలను తరిమి కొట్టినట్లు కొడతా!

Posted: 01/25/2017 09:33 AM IST

మావోయిస్టుల అణచివేత ప్రధాన లక్ష్యంగా పనిచేస్తున్నాడంటూ ఆరోపణలు ఎదుర్కుంటున్న బస్తర్‌ ఐజీ కల్లూరి పై మరోసారి తీవ్ర స్థాయిలో విమర్శలు వెలువెత్తాయి. ఇందుకు కారణం ఆయన ఫోన్ నుంచి అసభ్య పదజాలంతో కూడిన సందేశాలు వెలువెత్తటమే.

తీవ్ర పదజాలంతో కూడిన ఆయా సందేశాలను మీడియా బయటపెట్టడంతో అసలు వ్యవహారం వెలుగులోకి వచ్చింది. బేలా బాటియా అనే మహిళ, భద్రతా దళాలు అత్యాచారాలకు పాల్పడుతున్నారంటూ ఉద్యమిస్తున్న ఓ సామాజిక కార్యకర్త. ఈ నేపథ్యంలో సోమవారం ఓ వర్గం ఆమెను ఇంటి వద్ద ఉండగానే చంపుతామంటూ బెదిరింపులకు గురిచేసింది. తక్షణమే బస్తర్ వీడి వెళ్లాలంటూ ఆమెపై దాడికి పాల్పడింది. దీనిపై పలువురు బహిరంగంగానే తమ నిరసన వ్యక్తం చేశారు. దీని వెనుక కల్లూరి ఉన్నాడంటూ వారు ఆరోపిస్తున్నారు కూడా.

అంతేకాదు ఇందుక సంబంధించి ఆయన మొబైల్ కు వారు కొన్ని సందేశాలు కూడా పంపుతున్నారు. డబ్బుకు లొంగిపోయి ఇలా వృత్తికి ద్రోహం చేయటం సరికాదంటూ వారు అందులో పేర్కొన్నారు. దానికి అటు నుంచి కూడా ఘాటుగానే రిప్లైలు వచ్చాయి కూడా. సందీప్ సింగ్ అనే ఓ కార్యకర్త పంపిన సందేశానికి బదులుగా కల్లూరి నుంచి ‘‘ మావోలను మరియు వాళ్ల తొత్తులుగా పనిచేస్తున్న వాళ్లను బస్తర్ నుంచి కుక్కలను తరిమి కొట్టినట్లు కొడతా. జాగ్రత్త! అంటూ అందులో ఉంది.

దయ చేసి బేలా భాటియా భద్రత విషయంలో కల్పించుకోవాలంటూ మరో సందేశానికి బూతు సమాధానం ఇవ్వటం కూడా వెలుగులోకి వచ్చింది. ఈ విషయమై ఆరాతీసేందుకు యత్నించిన మీడియాకు చిక్కకుండా తిరిగిన కల్లూరి ఎట్టకేలకు స్పందించాడు. అదంతా అబద్ధమని, దీనిపై లోతుగా విచారణ జరుపుతామని తెలిపాడు.