ఎట్టకేలకు చిరును కలిసిన పవన్

Posted: 01/20/2017 09:04 AM IST

మెగా అభిమానులకు పండగలాంటి వార్త. మెగా స్టార్ చిరంజీవితో త‌మ్ముడు ప‌వ‌న్ క‌ల్యాణ్ ఎట్టకేలకు భేటీ అయ్యాడు. తాజాగా చిరంజీవి న‌టించిన ఖైదీ నంబ‌రు 150 సినిమా విడుదలై వసూళ్ల ప్రభంజనం సృష్టిస్తోంది. ఈ నేపథ్యంలో అన్నయ్యకు కంగ్రాట్స్ చెప్పేందుకు పవన్ వెళ్లినట్లు తెలుస్తోంది.

నిజానికి ప్రీ రిలీజ్ వేడుక‌కు పవన్ హాజ‌రు కావాల్సి ఉంది. అయితే కాటమరాయుడు షూటింగ్, రాజకీయ కారణాలతో బిజీగా ఉండటంతో అది కుదరలేదు. చాలా ఏళ్ల తర్వాత చిరు రీఎంట్రీ ఇస్తుంటే పవన్ అంత బిజీ అయిపోయాడా? అంటూ విమర్శలు వినిపించాయి. ఎట్టకేలకు సమయం చిక్కటంతో ప‌వ‌న్ చిరు ఇంటికి వెళ్లి మరీ స‌మావేశం అయ్యాడు. ఆపై కుటుంబ సభ్యులతో డిన్నర్ కూడా చేసినట్లు తెలుస్తోంది. అయితే సినిమా సంగతి పక్కన పెడితే, రాజకీయంగా వీరు ఏవైనా చర్చింకున్నారా? అన్నది ఇప్పుడు హాట్ టాపిక్ గా మారింది.

కాగా, ఖైదీ నంబర్ 150 చిత్రం సక్సెస్ కావాలంటూ పవన్ తన ట్విట్టర్ ద్వారా విషెస్ తెలియజేసిన విషయం తెలిసిందే. మొత్తానికి పవన్ ఎట్టకేలకు చిరును కలవడంతో విమర్శలకు చెక్ పడటమే కాదు, మెగా అభిమానులు పండగ చేసుకుంటున్నారు.