బాలయ్యపై కేసు కోసం జీవో జారీ చేశారు

Posted: 09/15/2016 11:00 AM IST

ఏపీ సర్కార్ టాలీవుడ్ హీరో, హిందుపురం ఎమ్మెల్యే నందమూరి బాలకృష్ణకు పెద్ద ఊరటనిచ్చింది. ఏడేళ్ల క్రితం ఆయనపై నమోదైన ఓ కేసులో విచారణను నిలిపేయాలని ప్రభుత్వం ఏకంగా జీవో జారీ చేసింది. 2009 అసెంబ్లీ ఎన్నికల సమయంలో నరసరావుపేట నుంచి తెలుగుదేశం అభ్యర్థిగా కోడెల శివప్రసాద్ నిలబడగా, ఆయన తరఫున ప్రచారం చేసేందుకు బాలకృష్ణ హాజరయ్యారు. ఆ సమయంలో పోలీస్ యాక్ట్ అమలులో ఉండగా, నిబంధనలను అతిక్రమించి మరీ ఆయన సభ, ర్యాలీ నిర్వహించారు.

దీంతో బాలకృష్ణతో పాటు కోడెల, ఆయన కుమారుడు శివరామకృష్ణ, గుంటూరు-2 ఎమ్మెల్యే మోదుగుల వేణుగోపాలరెడ్డి, తదితర 15 మందిపై కేసు నమోదైంది. ఏడేళ్లుగా ఈ కేసులో విచారణ కొనసాగుతూనే ఉంది. అయితే ప్రస్తుతం ఈ కేసుపై చొరవ తీసుకున్న ఏపీ సీఎం, బాలయ్య వియ్యంకుడు చంద్రబాబు దానిని లైట్ తీస్కోవాల్సిందిగా పోలీస్ శాఖను ఆదేశించారు. దీంతో ఈ కేసులో ప్రాసిక్యూషన్ ను నిలిపివేయాలని రాష్ట్ర డీజీపీ ఆదేశాలు ఇవ్వడంతో, ఈ మేరకు ప్రిన్సిపల్ సెక్రటరీ ఏఆర్ అనురాధ జీవో నంబరు 122ను విడుదల చేశారు.