ఆర్బీఐ నకిలీ నోట్లు ప్రింట్ చేస్తుందా?

Posted: 06/18/2016 12:48 PM IST

Rbi print and released pre five hundred rupees notes

బ్యాంకులన్నింటికి పెద్దగా ఉండటంతోపాటు దేశ ఆర్థిక లావాదేవీలు అంశాలను శ్రద్ధతో చూసుకుంటుంది రిజర్వ్ బ్యాంక్ ఆఫ్ ఇండియా (ఆర్బీఐ). దేశంలోని పలు ప్రాంతాల్లో బ్రాంచీలను ఏర్పాటు చేసుకుని మింట్ కాంపౌండ్ల సహయంతో కరెన్సీ ముద్రణ బాధ్యతను కూడా భుజస్కందాలపై వేసుకుంది. ఏ మాత్రం చిన్న పోరపాటు జరిగినా సరే దేశ ఆర్థిక వ్యవస్థపై అది తీవ్ర ప్రభావం చూపుతుందనటంలో ఎలాంటి సందేహం అక్కర్లేదు. అలాంటిది జాగ్రత్తగా వ్యవహరించాల్సిన అధికారులు చిన్నపాటి నిర్లక్ష్యం వహించటంతో పెద్ద తప్పిదమే జరిగిపోయింది.

సాధారణంగా ఆర్బీఐ కరెన్సీ నోట్లు ముద్రించే సమయంలో ఆ నోట్లు చెలామణిలోకి వచ్చిన సంవత్సరాన్ని పేర్కోంటాయి. అయితే తమిళనాడులో మాత్రం ఓ రెండేళ్ల తర్వాత అంటే 2018 లో రావాల్సిన 500 రూపాయల నోట్లు ప్రస్తుతం చెలామణి అవుతున్నాయి. చెన్నైలోని ఆర్బీఐ ప్రాంతీయ కార్యాలయంలో నిర్వహించిన మీడియా సమావేశంలో ఓ జర్నలిస్ట్ ఈ విషయమై అధికారులను ప్రశ్నించాడు. 2018లో విడుదల కావాల్సిన రూ.500 నోట్లు అప్పుడే చెలామణిలోకి వచ్చాయా అంటూ ఓ నోటును అధికారులకు చూపాడు. అయితే షాక్ తిన్న అధికారులు అది తాము ప్రింట్ చేసిందే అని నిర్ధారించుకున్నారు.

అయితే దీనిపై తమకు ఇప్పటిదాకా ఫిర్యాదు అందలేదని చెప్పిన సదరు ఆర్బీఐ అధికారి, విచారణకు మాత్రం ఆదేశించినట్లు తెలుస్తోంది. పోలీసులు కూడా సదరు వ్యవహారంపై సమాచారాన్ని సేకరించే పనిలో పడ్డారట. దేశంలో పెద్ద ఎత్తున చెలామణి అవుతున్న దొంగ నోట్లలోనే ఆయా నోట్లు కూడా కలిసిపోయాయన్న అనుమానాలు వ్యక్తం చేస్తున్నారు. తమిళనాట వెలుగుచూసిన ఓ ఘటన అటు ఆర్బీఐ అధికారులతో పాటు ఇటు సాధారణ జనాలను కూడా బెంబేలెత్తిస్తోంది.

భాస్కర్