గొడుగులందు ఈ గొడుగు వేరయా..!

Posted: 03/23/2016 11:53 AM IST

పురుషులందు పుణ్యపురుషులు వేరయా.. విశ్వదాభిరామ వినురవేమ అని చదువుకున్నాం. కానీ తాజాగా ఓ గొడుగు గురించి వార్త చదివిన తర్వాత మాత్రం గొడుగులందు ఈ గొడుగు వేరయా అని అనకమానరు. ఎందకంటే ఆ గొడుగు చాలా స్మార్ట్ కాబట్టి. అవును స్మార్ట్ ఫోన్, స్మార్ట్ వాచ్ గురించి విన్నారేమో.. కానీ ఈ స్మార్ట్ గొడుగు గురించి మాత్రం విని ఉండరు కదా. అయితుే ఈ గొడుగు గురించి తెలుసుకొండి.  మామూలుగా వర్షం వస్తుందని ముందు జాగ్రత్తగా గొడుగు తీసుకుపోతాం. కానీ ఆ రోజు మాత్రం వర్షం పడదు. ఇలా చాలా మందికి ఎదురై ఉంటుంది.

కానీ తాజాగా మార్కెట్ లోకి రాబోతున్న ఈ స్మార్ట్ గొడుగు పేరు ఉంబరెల్లా. అంబరిల్లాకు స్మార్ట్ ను జోడించి ఉంబరెల్లాగా మార్చారు. వర్షం వచ్చే ముందు గొడుగు మనల్ని హెచ్చరిస్తే ఎలా ఉంటుంది? సరిగ్గా ఇలాంటి ఐడియాతోనే  పారిస్ లోని వెజ్జూ అనే స్టార్టప్‌ కంపెనీ ఓ గొడుగును రూపొందించింది.  కంపెనీ వారు మాట్లాడుతూ… ఈ స్మార్ట్ గొడుగుకు  ‘ఊంబరెల్లా’ అని పేరు పెట్టామని అన్నారు. ఇది యాప్‌ సహాయంతో కనెక్టై..  హైపర్‌ లోకల్‌ వెదర్‌ డేటాను ట్రాక్‌ చేస్తుందని,  వర్షం పడటానికి పావుగంట ముందే అలర్ట్‌ చేస్తుందని అంటున్నారు.  ఇక వర్షంలో తడిసే ఛాన్సే ఉండదని చెబుతున్నారు.