తెలుగు రాష్ట్రాలకు రైల్వే బడ్జెట్ లో మొండిచేయి

Posted: 02/25/2016 03:09 PM IST

రైల్వే బడ్జెట్‌లో తెలంగాణకు మరోసారి కేంద్రం మొండి చేయి చూపింది. తెలంగాణకు ఈ సారి కూడా న్యాయం జరగలేదు. తెలంగాణ ప్రజానీకానికి మరోసారి నిరాశే ఎదురైంది. ఇచ్చిన హామీలను గాలికి వదిలేసింది. కొత్త రైల్వే ప్రతిపాదనలను పట్టించుకోలేదు. కాజీపేట రైల్వే కోచ్ అంశాన్ని ప్రస్తావించనే లేదు. యాదాద్రి వరకు ఎంఎంటీఎస్ పొడిగింపు ప్రస్తావనే లేదు. పెద్దపల్లి - కరీంనగర్- నిజామాబాద్, మనోహరాబాద్ - కొత్తపల్లి, భద్రాచలం - సత్తుపల్లి కొత్త లైన్ల కల సాకారం కాలేదు. రైల్వే బడ్జెట్ తెలంగాణ ప్రజానీకాన్ని నిరాశపర్చిందని పలువురు వ్యాఖ్యానిస్తున్నారు.

పార్లమెంట్ లో రైల్వే బడ్జెట్ ప్రవేశపెట్టిన రైల్వే మంత్రి సురేష్ ప్రభు విశాఖ రైల్వే జోన్‌ ఊసెత్తలేదు. అంతేకాకుండా ఆంధ్రప్రదేశ్ కు కొత్త రైళ్లు ప్రకటించలేదు. తద్వార రైల్వే బడ్జెట్ లో ఏపీకి కేంద్రం సముచిత ప్రధాన్యం కల్పించలేదనేది స్పష్టంగా కనపడుతుంది. దీంతో ఏపీ ప్రజల్లో అసంతృప్తి వ్యక్తమవుతోంది. ఇక ఆంధ్రప్రదేశ్ లో తిరుపతి రైల్వే స్టేషన్ ను ఆధునీకరిస్తామని హామీయిచ్చారు. దశాబ్దాలుగా పెండింగ్ లో ఉన్న కోటిపల్లి-నర్సాపురం రైల్వే లైన్ ఏర్పాటుకు మోక్షం లభించలేదు.