కన్హయ్యకు సుప్రీంకోర్టులో ఎదురుదెబ్బ

Posted: 02/19/2016 12:52 PM IST

జెఎన్ యు విద్యార్థి నాయకుడు కన్హయ కుమార్ బెయిల్ మీద సుప్రీంకోర్టు ప్రతికూలంగా స్పందించింది. దేశద్రోహం కింద కేసు నమోదుచేయబడిన కన్హయ కుమార్ తనకు తీహార్ జైల్లో ప్రాణహాని ఉందని, తన మీద తోటి ఖైదీలు ఎప్పుడైనా దాడి చెయ్యవచ్చని అందుకే బెయిల్ మంజూరు చెయ్యాలని సుప్రీంకోర్టులో పిల్ దాఖలు చేశారు. అయితే దీని మీద సుప్రీంకోర్టు న్యాయమూర్తులు ప్రతికూలంగా స్పందించారు. మీరు ముందు హైకోర్టుకు ఎందుకు వెళ్లలేదని ప్రశ్నించింది. ఇప్పుడు ఉన్న పరిస్థితుల్లో తాము ఈ కేసును విచారణకు స్వీకరించలేమని కూడా సుప్రీంకోర్టు స్పష్టం చేసింది.

కన్హయ కుమార్ తరఫు లాయర్లు బెయిల్ గురించి వాదన మొదలుపెట్టగానే. సుప్రీంకోర్టు న్యాయమూర్తులు ముందు మీరు కింద కోర్టును ఎందుకు ఆశ్రయించలేదు... మా వద్దకు నేరుగా ఎందుకు వచ్చారు అని ప్రశ్నించారు. దానికి కన్హయ కుమార్ తరఫు లాయర్ సమాధానమిస్తూ.. పటియాలా కోర్టులో లాయర్లు రెండు వర్గాలుగా చీలిపోయి.. కేసు వాదించడడానికి వస్తున్న లాయర్ల మీద కూడా దాడులకు పాల్పడుతున్నారని వెల్లడించారు. కాబట్టే తాము నేరుగా సుప్రీంకోర్టుకు వచ్చామని తెలిపారు. అయితే దీనికి సమ్మతించని కోర్టు ముందు కింద కోర్టుకు (హైకోర్టుకు) వెళ్లాలని సలహా ఇచ్చారు.