గులాబీ జెండా ఎగరకపోతే రాజీనామాకు కేటీఆర్ సవాల్

Posted: 01/11/2016 04:27 PM IST

టీఆర్ఎస్ పై ప్రగల్భాలు పేలుతున్న కిషన్ రెడ్డి మాటలు చూస్తే బీజేపీ భారతీయ జోక్ పార్టీ అన్నారు కేటీఆర్. మతాన్ని పట్టుకుని తిరుగుతూ ప్రజలను పట్టించుకోని పార్టీ బీజేపీ అని ఎద్దేవా చేశారు. పాతబస్తీ అభివృద్ది చెందకపోవడానికి మజ్లిస్ పార్టీనే కారణమంన్నారు. గతంలో గ్రేటర్ పీఠాన్ని ఏలిన మజ్లీస్... ఏం చేసిందని ప్రశ్నించారు కేటీఆర్. కేసీఆర్ లాంటి నాయకుడు ఈ రాష్ట్రానికి అవసరమని, ఇంకో 15 ఏళ్లు సీఎంగా, పార్టీ అధ్యక్షుడిగా కొనసాగాలని ఆకాంక్షిస్తున్నట్లు తెలిపారు. ఎంతమంది సినిమా యాక్టర్లు వచ్చినా తమకు పోయేదేమి లేదని, కేసీఆర్ గ్లామర్ తమకు ఉందన్నారు. ఆ రోజు తమాషాగా అన్న మాటలను చిలువలు వలువలు చేశారని కేటీఆర్ విమర్శించారు.

 గ్రేటర్ హైదరాబాద్ మున్సిపల్ కార్పోరేషన్ పీఠంపై గులాబీ జెండా ఎగరకపోతే మంత్రి పదవికి రాజీనామా చేస్తానని మంత్రి కేటీఆర్ ప్రతిపక్షాలకు సవాల్ విసిరారు. నా సవాల్‌ను స్వీకరించేందుకు ప్రతిపక్షాలు ముందుకు వస్తాయా అని ప్రశ్నించారు. 100 స్థానాల్లో విజయం సాధిస్తాం, ఎవరితోనూ పొత్తు లేదని తేల్చి చెప్పారు. నాకు మంత్రి పదవే ఎక్కువ... ముఖ్యమంత్రి పదవిపై ఆశలేదని తేల్చి చెప్పారు. మరో 15 ఏళ్లు కేసీఆర్ ముఖ్యమంత్రిగా ఉండాలని ఆకాంక్షించారు.తనకు మంత్రి పదవే ఎక్కువని ముఖ్యమంత్రి పదవి మీద తనకు మోజు లేదని కూడా కేటీఆర్ ఈ సందర్భంగా స్పష్టం చేశారు.