మోడీ ఏడాది పాలనలో ఎక్కడ వేసిన గొంగలి అక్కడే..

Posted: 05/27/2015 01:22 PM IST

భారత ప్రధాని నరేంద్ర మోడీ ఏడాది పాలనపై అమెరికా మీడియా పెదవి విరిచింది. ప్రధాని మోడీ మానస పుత్రికలా పేర్కోన్న ‘మేక్‌ ఇన్‌ ఇండియా’కు అత్యంత ప్రాధాన్యం ఇచ్చినా.. ఏడాదిగా అది ఎక్కడ వేసిన గోంగలి అక్కడే అన్నట్లుగా వుందని, ఏడాదిలో కేవలం ప్రచార ఆర్భాటానికే పరిమితమైందని విమర్శించింది. యేడాదికి కోటి ఉద్యోగాల కల్పన ఇస్తామన్న ఎన్నికల వాగ్ధానాల నేపథ్యంలో.. దేశీయ యువత ఉద్యోగ కల్పనపై భారీ అంచనాలు పెట్టుకున్నా జాబ్‌ మార్కెట్‌ ఇప్పటికీ స్తబ్ధుగానే ఉందని వ్యాఖ్యానించింది.

‘ఇండియాస్‌ మోదీ ఎట్‌ వన్‌ ఇయర్‌: ‘యుఫోరియా ఫేజ్‌’ ఈజ్‌ ఓవర్‌. చాలెంజెస్‌ లూమ్‌’ అంటూ వాల్‌సీ్ట్రట్‌ జర్నల్‌ కథనాన్ని ప్రచురించింది. ఆర్థికాభివృద్ధిని పునరుజ్జీవింపచేయడానికి, మార్పు కోసం ప్రజలు మోదీకి అధికారం ఇచ్చారని, కానీ, ఆ ఆశలు అడియాసలు అవుతున్నాయని కథనాన్ని ప్రచురించింది. ఆర్థిక వ్యవస్థ కుంటినడక నడుస్తోందని, కేపిటల్‌ ఇన్వెస్ట్‌మెంట్‌కు ద్రవ్యోల్బణ ఆధారిత రుణాలు 2004 నుంచి ఎన్నడూ చూడని స్థాయికి దిగజారాయని, వరుసగా ఐదో నెలలోనూ ఎగుమతులు పడిపోయాయని వివరించింది. ‘‘విదేశాల నుంచి చూస్తే, భారతదేశం ఇప్పుడు ఆశావహంగా కనిపిస్తోంది. స్వదేశంలో మాత్రం, ఉద్యోగాల పెరుగుదల మందకొడిగా ఉందని న్యూయార్క్‌ టైమ్స్‌ పేర్కొంది.

జి.మనోహర్