లోకేష్.. కేటీఆర్ గురించి అలా అంటావా..?

Posted: 05/18/2015 11:06 AM IST

నారా లోకేష్.. ఇప్పుడు తెలుగుదేశం పార్టీలో బాగా వినిపిస్తున్న పేరు. గత కొంత కాలంగా పార్టీలో కీలకంగా మారి.. ప్రస్తుతం పార్టీలో నెంబర్ టూగా చక్రం తిప్పుతున్న నేత. అయితే నారా లోకేష్ గత వారం అమెరికాకు పర్యటన కోసం వెళ్లారు. అక్కడ అమెరికా అధ్యక్షుడు బరాక్ ఒబామాతో కలిసారు. అయితే అదే సమయంలో తెలంగాణ ముఖ్యమంత్రి కేసీఆర్ కొడుకు, తెలంగాణ ఐటి మంత్రి కేటీఆర్ కూడా విదేశాలకు వెళ్లారు. అటు ఏపి ముఖ్యమంత్రి కొడుకు, ఇటు తెలంగాణ ముఖ్యమంత్రి కొడుకు ఇద్దరూ కూడా విదేశీ పర్యటనలకు వెళ్లడంతో మీడియాలో ఇద్దరిని పోలుస్తూ వార్తలు వచ్చాయి. అయితే ఇద్దరు వెళ్లిన దేశాలు వేరే, వారి పరిస్థితులు వేరే అయినా మీడియా వాళ్లు మాత్రం వారి ఇద్దరి మధ్య పోలీకలు, భేదాలు అంటూ వరుస కథనాలు ప్రచారం చేశారు. అయితే దీనిపై లోకేష్ స్పందించారు. కేవలం స్పందించడం ఒక్కటే కాదు కేటీఆర్ గురించి ఓ మాట కూడా అన్నారు.

కేటీఆర్ ఓ మంత్రిగా పర్యటించారు కానీ నేను మాత్రం ఓ మామూలు కార్యకర్తలా పర్యటించాను అని అన్నారు. ఏపిలో వ్యాపారానికి అనువైన పరిస్థితులను గురించి వివరించడానికి అమెరికాకు వెళ్లాడట. కేటీఆర్ ఓ మంత్రిగా వెళ్లి రెండు డీల్స్ మాత్రమే కుదుర్చుకు వచ్చాడని .. కానీ తమ అధినేత, తన తండ్రి నారా చంద్రబాబు నాయుడు త్వరలోనే పర్యటనలో చాలా డీల్స్ కుదురుతాయని అన్నారు. అయితే కావచ్చు కానీ ఓ మామూలు కార్యకర్తలా వెళ్లిన లోకేష్ కు నిజంగా మామూలు కార్యకర్తకు లభించే మర్యాదలు లబించాయా..? లోకేష్ మామూలు కార్యకర్తే అయితే ఇంత హడావడి ఉండేదా..? అన్న ప్రశ్నలకు సమాధానాలు రావాలి. మరి కేటీఆర్ పర్యటనకు సంబందించి ఎలాంటి వివాదాలు రాలేదు. కానీ లోకేష్ పర్యటనలో మాత్రం డబ్బులు పెట్టి మరీ బిల్డప్ కోసం ఒబామాను కలిసినట్లు వార్తలు వచ్చాయి. అయినా పాపం.. లోకేష్ గురించి పల్లెత్తి మాట మాట్లాడకుండానే కేటీఆర్ మీద విమర్శలు చెయ్యడం ఏమైనా బాగుందా అని కూడా కొందరు అనుకుంటున్నారట.

*అభినవచారి*