యాదగిరి కాదు ఇకపై యాదాద్రి

Posted: 03/06/2015 10:34 AM IST

తెలంగాణలోని యాదగిరిగుట్ట క్షేత్రాన్ని ప్రపంచస్థాయి పుణ్యక్షేత్రంగా తీర్చిదిద్దడానికి కేసీఆర్‌ చర్యలు తీసుకుంటున్నారు.  త్రిదండి శ్రీమన్నారాయణ చిన జీయర్‌ స్వామి సూచన మేరకు యాదగిరిగుట్టను ఇకపై యాదాద్రిగా వ్యవహరించాలని నిర్ణయించారు. యాదగిరిగుట్టగా ఇప్పుడున్న కొండతో పాటు చుట్టుపక్కల మరో ఎనిమిది కొండలను కలిపి నవగిరులుగా, అద్భుత ఆధ్మాత్మిక క్షేత్రాలుగా అభివృద్ధి చేయాలని తెలంగాణ ప్రభుత్వం నిర్ణయించింది.  ప్రధాన కొండకు యాదాద్రిగా నామకరణం చేసిన జీయర్‌ స్వామి, మిగిలిన ఎనిమిది కొండలకు త్వరలో పేర్లు పెడతామని సీఎంకు తెలిపారు. జీయర్‌స్వామికి హెలికాప్టర్‌ నుంచి ఆలయ అభివృద్ధి ప్రణాళికలను, వాటికి కేటాయించే స్థలాలను సీఎం చూపించారు.  మొత్తం ఆలయాలను దర్శించడానికి వీలుగా మోనో రైలు, దేవస్థానం తరపున ప్రయాణ సౌకర్యాలు కల్పించే ఆలోచన ఉన్నట్టు చినజీయర్‌స్వామికి సీఎం కేసీఆర్‌ చెప్పారు.

ఆగమ శాస్త్ర ప్రకారం గర్భాలయం, ఆంజనేయ స్వామి విగ్రహాల స్థలాల్లో ఎలాంటి మార్పు లేకుండా.. కృత్రిమత్వం కనబడకుండా శిల్పకళ ఉట్టిపడే విధంగా నిర్మించాలని ప్రభుత్వం కసరత్తులు చేస్తోంది. ఆలయ మండపం ఎదుట ఎలాంటి కట్టడాలు లేకుండా విశాలమైన హరిత నందనం ఏర్పాటు, వాహనాల పార్కింగ్‌ వంటి నిర్మాణాలు చేపడుతున్నట్టు వివరించారు. క్షుణ్ణంగా ప్లాన్‌ను పరిశీలించిన జీయర్‌ స్వామి ముసాయిదా ప్రణాళిక ఆగమ శాస్త్ర ప్రకారమే ఉందని తెలిపారు. ఆలయ ప్రాకారం బయట దుకాణాల సముదాయాన్ని సైతం ఆధ్యాత్మికశోభతో కళాత్మకంగా నిర్మించాలని జీయర్‌స్వామి సూచించారు. మొత్తానికి తెలంగాణ ప్రభుత్వం అనుకున్న విధంగా యాదగిరి పుణ్యక్షేత్రం కొత్త రూపు సంతరించుకోవడానికి సర్వం సన్నద్దమవుతోంది. మరి కొన్ని నెలల్లోనే పాత యాదగిరి స్థానంలో, కొత్త యాదాద్రిని భక్తులు చూడవచ్చు.
- అభినవచారి