పూరీ భార్యతో దురుసుగా ప్రవర్తించిన ఎస్ఐపై వేటు..

Posted: 02/18/2015 11:11 AM IST

Puri jagannath wife lavanya palvancha si shanmugachari controversy

టాలీవుడ్ ప్రముఖ దర్శకుడు పూరీజగన్నాథ్ భార్య లావణ్యకు ఇటీవలే ఓ చేదు అనుభవం ఎదురైంది. ఆమె తన తాజా మూవీకి సంబంధించిన వ్యవహారాల్లో నిమగ్నమై పని చేసుకుంటుంటే.. అనవసరంగా అందులో ఓ పోలీస్ అధికారి దూరాడు. అంతేకాదు.. ఆమెతో దురుసుగా కూడా ప్రవర్తించాడు. ఓ పోలీస్ తనతో అలా ప్రవర్తించడంపై తీవ్ర అసంతృప్తికి గురైన లావణ్య.. అతనిపై ఫిర్యాదు చేసింది. అంతే! పై అధికారులు అతడిపై వేటు వేశారు.

వివరాల్లోకి వెళ్తే.. పూరీ కుమారుడు హీరోగా ఇండస్ట్రీకి ఎంట్రీ ఇవ్వబోతున్న విషయం తెలిసిందే! ఆ మూవీ కోసం పూరీ భార్య లావణ్య పాల్వంచ ప్రాంతానికి వెళ్లారు. షూటింగ్ అక్కడే జరుగుతున్నందున ఆమె చిత్ర యూనిట్ తో కలిసి ఓ హోటల్ లో బస చేశారు. ఆమె బస చేసిన గదిలో ఆమెతోపాటు చిత్ర హీరోయిన్, ఇతర జూనియర్ నటీనటులు కూడా వున్నారు. తమ చిత్రానికి సంబంధించిన వ్యవహారాలపై చర్చించుకుంటున్నారు.

ఈ క్రమంలో రెగ్యులర్ తనిఖీల్లో భాగంగా పాల్వంచ ఎస్ఐ షణ్ముగాచారి ఈనెల 11వ తేదీన లావణ్య బస చేసిన హోటల్ ను పరిశీలించారు. ఆ హోటల్ లో అన్ని గదులను ఆ ఎస్ఐ తనిఖీ చేస్తూ.. లావణ్య వుంటున్న రూంను కూడా పరిశీలించారు. అప్పుడు ఆమె తనగురించి, యూనిట్ గురించి ఆ ఎస్ఐకి తెలిపినప్పటికీ.. ఆయన మాత్రం ఐడీ కార్డులు చూపాలంటూ కటువుగా మాట్లాడారు. అంతేకాదు గదిలోని బాత్ రూంను కూడా తనిఖీ చేశారు.

ఎస్ఐ షణ్ముగాచారి ఆ విధంగా తనిఖీ చేయడంతో ఇబ్బందిపడ్డ లావణ్య.. ఈ మొత్తం తతంగాన్ని భర్త పూరీకి ఫిర్యాదు చేసింది. ఎస్ఐ తీరుపై ఆగ్రహం వ్యక్తం చేసిన పూరీ.. వెంటనే డీజీపీ, కొత్తగూడెం డీఎస్పీకి ఫోన్ లో ఫిర్యాదు చేశారు. ఇతనిచ్చిన ఫిర్యాదుతో విచారణ జరిపిన ఉన్నతాధికారులు.. ఎస్ఐ షణ్ముగాచారి, పూరీభార్య లావణ్యతో దురుసుగా ప్రవర్తించారని నిర్థారించారు. దీంతో ఆయన్ను పాల్వంచ పీఎష్ నుంచి బదిలీ చేస్తూ ఉత్తర్వులు జారీ చేశారు. అయితే.. ఇంకా ఆయనకు ఎక్కడా పోస్టింగ్ ఖరారు చేయలేదని సమాచారం!