టాలీవుడ్ నటి తెలంగాణ శకుంతల తిరిగిరాని లోకాలకు

Posted: 06/14/2014 08:07 AM IST

Tollywood actress telangana shakuntala died

టాలీవుడ్ మరో మంచి నటిని కోల్పోయింది. టాలీవుడ్ పరిశ్రమలో తెలంగాణ యాసతో ప్రేక్షకుల మనస్సు దొచుకున్న తెలంగాణ శకుంతల శుక్రవారం (63) అర్థరాత్రి దాటిన తరువాత గుండెపోటుతో ఆక్మస్మిక మరణం చెందింది. హైదరాబాద్ శివారు కొంపల్లిలోని తన నివాసంలో శుక్రవారం రాత్రి అకస్మాత్తుగా గుండెపోటురావడంతో సురారంలోని నారాయణ హృదయాలయ ఆస్పత్రికి తరలించారు. వైద్యులు ఆమెను పరీక్షించగా అప్పటికే మృతిచెందినట్లు వైద్యులు ధ్రువీకరించారు.

టాలీవుడ్ లో పలు చిత్రాల్లో క్యారెక్టర్ ఆర్టిస్టుగా విలక్షణ పాత్రలు పోషించిన ఈమె 1981లో తెలుగు తెర అరంగ్రేటం చేసిన ఈమె ఇప్పటి వరకు 70 చిత్రాల్లో నటించారు. ఈమె నటించిన తొలి చిత్రం భూమి కాగా, ఆఖరు చిత్రం పాండవులు పాండవులు తుమ్మెద. గులాబి చిత్రంతో ఈమెకు మంచి గుర్తింపు తెచ్చి పెట్టడంతో ఈమె వెనక్కి తిరిగి చూసుకోవాల్సిన అవసరం రాలేదు. ఇక ‘ఓసేయ్ రాములమ్మ ’ సినిమాతో ఆమెకు ‘తెలంగాణ శకుంతల ’ అనే ముద్ర పడిపోయింది. తెలుగులోనే కాకుండా తమిళ చిత్రాల్లో కూడా నటించిన ఆమె కామెడీ, విలన్, పోలీస్ పాత్రలు పోషించి తన నటనా ప్రతిభా పాటవాలను ప్రదర్శించింది.

ఆమె నటించిన చిత్రాల్లో.. ఆహ నా పెళ్లంట, గులాబీ, నువ్వునేను, ఎవడిగోల వాడిదే, సినిమాలు మంచి పేరును తెచ్చి పెట్టాయి. క్యారెక్టర్ ఆర్టిస్టుగా, హాస్యనటీగా శకుంతల మంచి గుర్తింపు తెచ్చుకున్నారు. తెలంగాణ యాసతో మాట్లాడుతూ టాలీవుడ్ లో ప్రయాణం సాగిస్తున్న ఈమె ఇలా అకస్మాత్తుగా మరణించడంతో యావత్ తెలుగు సినిమా పరిశ్రమ తీవ్ర దిగ్బాంతికి గురైంది.

శకుంతల సినీ పరిశ్రమకు చేసిన సేవను, ఆమెతో తమ అనుబంధాన్ని గుర్తు చేసుకొని.. శకుంతల మరణం టాలీవుడ్ కు తీరని లోటని, ఆమె ఆత్మకు శాంతి జరగాలని సంతాపం తెలిపారు. టాలీవుడ్ లో శ్రీహరి నుండి మొదలైన విషాదాలు నేడు తెలంగాణ శకుంతల వరకు కొనసాగుతూనే ఉన్నాయి. ఇండస్ట్రీ ప్రముఖ నటుడు వరుసగా తిరిగిరాని లోకాలకు వెళ్ళి పోతుండటంతో టాలీవుడ్ ని తీవ్రంగా కలిచివేస్తుంది.

Knr